ამ წუთებში, თბილისის საქალაქო სასამართლოში ხოფავას ქუჩაზე მოზარდებს შორის მომხდარი მკვლელობის საქმის განხილვა მიმდინარეობს.
"წინა პროცესზე წარმოდგენილი ჰყავდათ ექსპერტები, ერთ-ერთის დაკითხვა ვერ მოესწრო დროის სიმცირის გამო. დღეს სავარაუდოდ, კვლავ ეს ექსპერტი იქნება წარმოდგენილი. სხვა მოწმეებს, თუ ვის წარმოადგენს ბრალდების მხარე, ეს ჩვენთვის უცნობია", - აცხადებს ერთ-ერთი ბრალდებულის ადვოკატი,ეკატერინე მაჭარაშვილი.
რაც შეეხება, საქმის ერთ-ერთი მთავარი მოწმის, მიხეილ კალანდიას მიერ შეცვლილ ჩვენებას, როგორც მაჭარაშვილი აცხადებს, ის ამის გამო პასუხისგებაში უნდა მიეცეს.
"გიდასტურებთ, რომ მიხეილ კალანდიამ რამდენჯერმე შეცვალა ჩვენება. გამოძიებაში მას 3 სხვადასხვა ჩვენება აქვს მიცემული, ასევე მან სასამართლოში, ფიცის ქვეშ 2-ჯერ შეცვალა ჩვენება და ურთიერთსაწინააღმდეგო ჩვენებები მისცა. ის სრულწლოვანი გახდა და მის მიმართ, რა თქმა უნდა, უნდა აღიძრას სისხლის სამართლის საქმე", - აღნიშნავს ადვოკატი.
ის ბრალდების მხრიდან ექსპერტიზის ჩასატარებლად დროის ხელოვნურად გაჭიანურებაზე საუბრობს.
"ალტერნატიული ექსპერტიზის ჩატარებას ვაპირებთ, თუმცა, ნივთმტკიცებები კვლავ არ გადმოგვცემია, რაზეც ექსპერტიზა უნდა ჩატარდეს. ეს ნივთები სამხარაულის ექსპერტიზის ბიუროშია, ბრალდების მხარის ექსპერტიზა კვლავ არ დასრულებულა, რომელიც საეჭვოდ ჭიანურდება. საკმაოდ დიდი დრო გავიდა და ამ დროის განმავლობაში, გონივრული ზღვარიც გავიდა, აქამდე უნდა ყოფილიყო ექსპერტიზის დასკვნა", - აცხადებს მაჭარაშვილი.
ცნობიათვის,ხორავას ქუჩაზე,პირველ დეკემბერს, მოზარდებს შორის დაპირისპირებას ორი არასრულწლოვანის სიცოცხლე ემსხვერპლა.
