მოწმემ პირდაპირ განაცხადა, რომ იგი შემთხვევის ადგილზე მივიდა მას შემდეგ რაც, ადგილზე ჩხრეკები დასრულებული იყო. როდესაც პირველად მივიდა შემთხვევის ადგილზე, მან აღმოაჩინა მანქანის საბარგულზე დაწყობილი ავტომატური ცეცხლსასროლი იარაღი და საბრძოლო მასალა, - განაცხადა ბუტა რობაქიძის საქმის პროკურორმა, გიორგი ოსაძემ.
დღევანდელ პროცესზე წარადგინეს ვიდეოჩანაწერიც.
"როგორც ჩვენ, ასევე დაცვის მხარემ, წარვუდგინეთ ვიდეოჩანაწერი, სადაც მოწმე პირველად ფიქსირდება შემთხვევის ადგილზე, 01:33 წუთზე. ამ შემთხვევაში მნიშვნელოვანია გავიხსენოთ ვიდეოექსპერტის ჩვენება, რომელიც აცხადებს, რომ პირველი წყვეტა ამ ვიდეოჩანაწერზე ფიქსირდება 01:03 წამზე. შესაბამისად დღევანდელი მოწმის ჩვენებით კიდევ ერთხელ დადასტურდა, რომ ვიდეოჩანაწერის ქრონოლოგია ირღვევა. ჩვენების სანდოობის მხრივ კითხვის ნიშნები არ არსებობს", - აცხადებს ოსაძე.
ცნობისთვის, აღნიშნულ საქმეზე 6 პირი: გურამ დონაძე, ზაზა ბაქრაძე, ზურა მიქაძე, ლევან გვაზავა, ირაკლი ფირცხალავა და დავით იაშვილი არიან ბრალდებული.
ერთ-ერთი ბრალდებული, კრიმინალური პოლიციის ყოფილი უფროსი, ზაზა ბაქრაძე, რომელიც თბილისის საერთაშორისო აეროპორტში 28 თებერვალს დააკავეს, 30 მარტს, 5 000 ლარიანი გირაოს სანაცვლოდ სხდომათა დარბაზიდან გაათავისუფლეს.