დღეს ახალი გარემოება გამოჩნდა დღევანდელი ბრალდების მოწმით, უკვე ქრონოლოგიაში შევედით ჩიხში, - აცხადებს ბუტა რობაქიძის მკვლელობის საქმეზე სამსახურეობრივი უფლებამოსილების გადამეტებაში ერთ-ერთი ბრალდებული, გურამ დონაძე.
დღევანდელ პროცესზე დაიკითხა იმჟამინდელი პატრულ-ინსპექტორი, რომან ზანდარაშვილი, რომელიც აცხადებს რომ შემთხვევის ადგილზე გასროლიდან 3 საათში მივიდა.
"მანამდე თუ ვამტკიცებდით მონტაჟს და აღმოჩნდა წყვეტები არ არის, სიყალბე არ არის, ცოცხალია ადამიანია დაჭრილი და იარაღები ჩანს, დღეს უკვე ქრონოლოგიაში ვართ ჩიხში. ეს ადამიანი ამბობს გასროლიდან 3 საათის შემდეგ მივიდა. ჩვენებაში უწერია რაც სასამართლოზე გაიმეორა, რომ დონაძე არ უნახავს. წინა მოწმემ თქვა, დონაძე მერე მოვიდაო, 5-6 საათზე და კადრებს დგამდაო. ახლა გაჩვენებთ ამ მოწმის ვიზუალურ მასალას, სადაც ის იმ დროს ფიქსირდება, უწყვეტ, უხარვეზო და არამონტაჟურ კადრის ნაწყვეტში, სადაც დაჭრილი რობაქიძე ჯერ კიდევ ცოცხალია და ჩანს რომან ზანდარაშვილი იარაღებთან ერთად, ანუ როგორ პოულობს პატრული იარაღებს. რომელს დავუჯეროთ, მის ჩვენებას სადაც ამბობს, დილის 6 საათზე მოვიდა და თურმე, ამ დროს მე ერთი მოწმის ჩვენებით, იქ ვარ და დუბლიკატებს ვიღებ, თუ ზანდარაშვილი რომ ამბობს, იქ არ ვუნახივარ. ზანდარაშვილმა დღეს კატეგორიულად განაცხადა, რომ ის არ არის მსახიობი, ის არის პოლიციელი და არანაირ დადგმებში და დუბლებში მონაწილეობა არ მიუღია", - აცხადებს დონაძე.
ცნობისთვის, აღნიშნულ საქმეზე 6 პირი: გურამ დონაძე, ზაზა ბაქრაძე, ზურა მიქაძე, ლევან გვაზავა, ირაკლი ფირცხალავა და დავით იაშვილი არიან ბრალდებული.
ერთ-ერთი ბრალდებული, კრიმინალური პოლიციის ყოფილი უფროსი, ზაზა ბაქრაძე, რომელიც თბილისის საერთაშორისო აეროპორტში 28 თებერვალს დააკავეს, 30 მარტს, 5 000 ლარიანი გირაოს სანაცვლოდ სხდომათა დარბაზიდან გაათავისუფლეს.
