თბილისის საქალაქო სასამართლოში ამ წუთებში, ბუტა რობაქიძის მკვლელობის საქმეზე შსს-ს ყოფილი მაღალჩინოსნების მხრიდან სამსახურეობრივი უფლებამოსილების გადამეტების საქმის განხილვა მიმდინარეობს.
დღევანდელ პროცესზე დაკითხეს მოწმე ქეთევან კუპრეიშვილი, რომლის სახლიდან მოპარული იარაღებიც აღმოჩნდა 2004 წლის 24 ნოემბერს შემთხვევის ადგილზე.
"2001წელს გაიქურდა ქეთევან კუპრეიშვილის ბინა, საიდანაც მოიპარეს სამი ცეცხლსასროლი იარაღი. მათ შორის, ერთი იყო პისტოლეტი "ტაურუსი". 2004 წლის 24 ნოემბერს, ეს იარაღი აღმოჩნდა იმ მანქანაში, სადაც იჯდა ბუტა რობაქიძე. კუპრეიშვილი ამის შემდეგ დაიბარეს პოლიციაში, სადაც დაადასტურა, რომ მანქანიდან ამოღებული იარაღი ნამდვილად მისი სახლიდან მოპარული იარაღია. 2006 წელს შალვა ნიქაბაძე, ცრუ მოწმე და პროკურატურის ე.წ. ოქროს მოწმე, რომელიც ჩვენსკენ იშვერს ხელს სიყალბეზე და დანაშაულზე, იღებს სეიფიდან მტკიცებულებას, მიდის დაკარგული იარაღის მეპატრონესთან, ქალბატონ ქეთევან კუპრეიშვილთან, აწერინებს მას ყალბ ხელწერილს, რომ თითქოს რობაქიძის საქმის გამოძიება დასრულდა და თითქოს იარაღი დაუბრუნდა პატრონს, სინამდვილეში კი ნივთმტკიცებას ჩუქნის საკუთარ ძმაკაცს, პოლიციელს კახეთში.
ნიქაბაძის წინააღმდე პროკურატურამ 2012 წელს ორი მუხლით დაიწყო გამოძიება და ეს საქმეები დღემდე თაროზე დევს. ამიტომაა ნიქაბაძე ოქროს მოწმე და ჩვენს წინააღმდეგ არის გამოყენებული ამ საქმეში. ადამიანს უმძიმესი მუხლით ემუქრება 9 წლამდე თავისუფლების აღკვეთა და რა თქმა უნდა, მისცემს ჩვენებას გურამ დონაძის, ზურაბ მიქაძის, დავით იაშვილის წინააღმდე. კუპრეიშვილმა დღეს დაადასტურა, რომ მისთვის არავითარი იარაღი არ გადაუცია ნიქაბაძეს", - აცხადებს საქმეზე ერთ-ერთი ბრალდებული, გურამ დონაძე.
პროკურორ გიორგი ოსაძის თქმით კი, მოპარული იარაღის გადაფორმება იმდროინდელ გამომძიებელზე მფლობელის თანხმობით მოხდა.
"დღევანდელ სასამართლო სხდომაზე დაკითხულ იქნა მოწმე, ვის სახელზეც იყო თავდაპირველად რეგისტრირებული ცეცხლსასროლი იარაღი და რომელიც ამოღებულია 2004 წლის 24 ნოემბერს, შემთხვევის ადგილიდან. ეს იარაღი ჩადებულია მაშინდელი თანამდებობის პირთა მიერ. მოცემულ საქმეზე აღნიშნული პირის დაკითხვა საჭირო გახდა, ვინაიდან ეს ცეცხლსასროლი იარაღი ბრალდების მხარეს წარდგენილი აქვს როგორც ნივთმტკიცება. შესაბამისად, კითხვა რომ არ ყოფილიყო დასმული აღნიშნული ნივთმტკიცების თავდაპირველ წარმომავლობასთან დაკავშირებით, რომ შემდგომ ნამდვილად დაკარგული იყო, ასევე შემდგომ როგორ და რა ფორმით აღმოჩნდა აღნიშნული იარაღი საქმეში, მისი დაკითხვა მოხდა. იარაღის ისტორიასთან და მიმდინარეობასთან დაკავშირებით დაიკითხა ეს მოწმე.
სასამართლოში განიხილება 2004 წლის 24 ნოემბერს ცეცხლსასროლი იარაღების ჩადების ფაქტი და არა გამომძიებლის მხრიდან ნივთმტკიცების გადაფორმება-გადმოფორმების საკითხი. დღევანდელო მოწმის დაკითხვის საჭიროება გახდა იქიდან გამომდინარე, რომ აღნიშნული იარაღი, ნივთმტკიცება საქმეში მოპოვებულია, ბრალდების მხარეს გვაქვს წარმოდგენილი და რომ ამ მოწმეს დაედასტურებინა ნამდვილად არსებობდა ასეთი იარაღი, ნამდვილად ჰქონდა შეძენილი და 4 წლით ადრე რომ ნამდვილად დაკარგა ის. 2004 წელს შემთხვევის ადგილიდან ამოღებული იყო იარაღი. მოწმემ განაცხადა რომ რაიმე იძულებას გადაფორმებისას ადგილი არ ჰქონია და ეს იარაღი სააგენტოში მეუღლის თანდასწრებით კონკრეტულ პიროვნებაზე გადააფორმა. თუმცა, ამ ნაწილს საქმის გარემოებებთან დაკავშირებით შემხებლობა არ აქვს", - აცხადებს გიორგი ოსაძე.
ცნობისთვის, აღნიშნულ საქმეზე 6 პირი: გურამ დონაძე, ზაზა ბაქრაძე, ზურა მიქაძე, ლევან გვაზავა, ირაკლი ფირცხალავა და დავით იაშვილი არიან ბრალდებული.
ერთ-ერთი ბრალდებული, კრიმინალური პოლიციის ყოფილი უფროსი, ზაზა ბაქრაძე, რომელიც თბილისის საერთაშორისო აეროპორტში 28 თებერვალს დააკავეს, 30 მარტს, 5 000 ლარიანი გირაოს სანაცვლოდ სხდომათა დარბაზიდან გაათავისუფლეს.