ბოლო პერიოდში კორუფციის წინააღმდეგ გატარებულმა ღონისძიებებმა ნათლად დაგვანახა, რომ აღნიშნულ დანაშაულში მონაწილე პირების მიმართ სახელმწიფო უსაფრთხოების სამსახურის პოზიცია საკმაოდ მკაცრია და არ არსებობენ ამ დანაშაულში ჩართული ხელშეუხებელი პირები, - ამის შესახებ სახელმწიფო უსაფრთხოების სამსახურის უფროსმა ვახტანგ გომელაურმა საქართველოს პარლამენტში პლენარულ სხდომაზე სუს-ის წლიურ ანგარიშის წარდგენისას განაცხადა.
მისი თქმით, სუს-ი განსაკუთრებულ მნიშვნელობას ანიჭებს სახელმწიფო და საზოგადოებრივ ინსტიტუტებში კორუფციის წინააღმდეგ ბრძოლას.
მისივე თქმით საანგარიშო პერიოდში, ანტიკორუფციული საქმიანობა მიმართული იყო სამოხელეო დანაშაულის, საჯარო სამსახურში ინტერესთა შეუთავსებლობისა და კორუფციის ფაქტების პრევენციის, გამოვლენის და აღკვეთის წინააღმდეგ.
„საქართველოს სახელმწიფო უსაფრთხოების სამსახურის ანტიკორუფციულ სააგენტოში გასული წლის განმავლობაში გამოძიება დაიწყო სისხლის სამართლის 62 საქმეზე, საანგარიშო პერიოდში ბრალდებულის სახით სისხლის სამართლის პასუხისგებაში მიცემულ იქნა 61 პირი, სისხლის სამართლის 41 საქმეზე”, – განაცხადა ვახტანგ გომელაურმა.