მზად ვართ, განვიხილოთ შესაძლებლობების გაზრდის საკითხი, კიდევ კიდევ უფრო ქმედითი, უფრო ფართო მანდატი ხომ არ უნდა ჰქონდეთ შემაკავებელი ორდერის გამომყენებელპირებს, – ამის შესახებ საქართველოს პარლამენტის იურიდიულ საკითხთა კომიტეტის თავმჯდომარე ეკა ბესელიამ „ევროპული საქართველოს“ ინიციატივასთან დაკავშირებით განაცხადა, რომლის მიხედვითაც ძალადობრივი დანაშაულის პრევენციის უკეთესი საშუალება მოძალადის 48 საათით დაკავება იქნება და არა შემაკავებელი ორდერის გამოწერა.
ბესელიას განცხადებით, აქ გასააზრებელი იქნება ორი ასპექტი:
„სისხლის სამართლის კოდექსს, აქვს მკვლელობის რამდენიმე შემადგენლობა: განზრახ მკვლელობა, განზრახ მკვლელობა დამამძიმებელ გარემოებაში და ნებისმიერი პირის მიმართ განხორციელებული ეს სასტიკი ქმედება შესაბამისად კვალიფიცირდება.
გვაქვს ცალკე ოჯახური ძალადობის მუხლი, რომელსაც ნაკლები სანქცია აქვს. ერთ-ერთი ვერსიით, ამ მუხლს უნდა დავამატოთ ცალკე პუნქტი და ჩამოვაყალიბოთ ფორმულირება, რომელიც ასეთი ტიპის შემთხვევებს უფრო მეტი სიმკაცრით დასჯიდა. ამას ძალიან კარგი სამართლებრივი ანალიზი სჭირდება.
და მეორე, ვფიქრობ, საჭირო იქნება პროცედურული ნაწილის კარგი ანალიზი, ანუ აღსრულების მექანიზმის, როდესაც შემაკავებელი ორდერის გამოყენება ხდება“, – განაცხადა ეკა ბესელიამ, რომელმაც აქვე განმარტა, რომ შესაძლოა იყოს იმ პირის დაკავების აუცილებლობა, რომლისგანაც საფრთხე მომდინარეობს, ან შესაძლოა, გარკვეულ შემთხვევებში პატიმრობის გამოყენება საჭირო არ იყოს და ასეთ დროს გამოიწეროს შემაკავებელი ორდერი.