„ჯი-ეიჩ-ენისთვის“ ექსკლუზიურად ცნობილი გახდა, რომ საბერძნეთში მცხოვრები ქართველი ქალის, 36 წლის დიანა ბერიძის მკვლელობაში ბრალდებულ ბერძენ ანგიოქირურგს უვადო პატიმრობა შეეფარდა.
საბერძნეთის სასამართლოში პროცესი ერთი საათის წინ დასრულდა. როგორც „ჯი-ეიჩ-ენს“ წყარო აწვდის ინფორმაციას, ექიმი პროცესზე თავს იმართლებდა და აცხადებდა, რომ ეს არა განზრახ მკვლელობა, არამედ, სამედიცინო შეცდომა იყო.
ბერძნული სახელმწიფო ბრალდებაც თვლიდა, რომ ექიმს ახალგაზრდა ქალის მკვლელობა განზრახული არ ჰქონდა, თუმცა, მის სიკვდილს ხელი შეუწყო და არ დაეხმარა.
„იმ მომენტში, როცა მივხვდი მოკვდა, ჩემს თავში ვერ ვიპოვე ძალა, რომ ვინმესთვის დამეძახა და დახმარება მეთხოვა“, - ეს მკვლელობაში ბრალდებული ექიმის ბოლო სიტყვებია, რაც სასამართლოზე განაცხადა.
წყაროს ცნობითვე, დღეს სასამართლოზე ერთ-ერთი ექპერტიზის შედეგიც წარადგინეს, რომლის მიხედვითაც, გარდაცვლილ დიანა ბერიძის ორგანიზმში ორი ძლიერი ნარკოტიკული საშუალების დიდი დოზა აღმოაჩინეს.
შეგახსენებთ, რომ 36 წლის ქართველი ქალის კვალი 2017 წლის 26 აპრილს, იპოკრატიოს საავადმყოფოში მისვლის შემდეგ გაქრა. მას ბერძენი სამართალდამცავები რამდენიმე დღის განმავლობაში ეძებდნენ. დიანა ბერიძის ცხედარი 4 მაისს, კუნძულ ხალხიდიკზე, ერთ-ერთ სოფელში იპოვეს. გარდაცვლილი ქმარმა საყურით ამოიცნო. გვამის აღმოჩენიდან მალევე დააკევს 38 წლის ანგიოქირურგი, რომელიც განზრახ მკვლელობას ამ დრომდე არ აღიარებს.
