„გადაწყვეტილებას გავასაჩივრებთ, რა თქმა უნდა იმიტომ, რომ არ ვეთანხმებით“, - განაცხადა ჟურნალისტებთან ბარნოვის ქუჩაზე მოკლული თაკო გამრეკელაშვილის საქმეზე დანაშაულის შეუტყობინებლობაზე დაკავებულ თეიმურაზ ბაქრაძის ადვოკატმა, ოთარ ხურციძემ.
მისი განმარტებით, თავიდან მისი დაცვის ქვეშ მყოფისთვის დანაშაულის შესახებ ცნობილი არ იყო, რადგან ბრალდებულმა მას ცრუ ინფორმაცია მიაწოდა.
„თეიმურაზ ბაქრაძესთან ვეფხია ბაქრაძე დაკავებამდე რამდენიმე საათით ადრე მივიდა. ღამე მასთან არ გაუთევია. საქმის მასალებიდან გამომდინარე, ტანსაცმელი ალბათ, მასთან გამოიცვალა, თუმცა თეიმურაზთან ამას არანაირი კავშირი აქვს. თეიმურაზმა ვეფხიას მიერ ჩადენილი დანაშაულის შესახებ თავიდან ნამდვილად არ იცოდა, ფაქტობრივად, დაკვებამდე 1-2 საათით ადრე გახდა მისთვის ეს ცნობილი. მან დაკავების შემდეგ გამოძიებასთან ყველანაირად ითანამშრომლა“, - აცხადებს ადვოკატი.
კითხვაზე, როცა ვეფხია ბაქრაძე მასთან სისხლიანი ტანსაცმლოთ მივიდა, ჰკითხა თუ არა მას, რატომ იყო სისხლიანი, ადვოკატი პასუხობს, რომ აღნიშნულის შესახებ მას დაკავებულმა ჰკითხა, მაგრამ პასუხი იყო, ის რომ მეგობართან სვამდა და ნასვამ მდგომარეობაში სადღაც, თხრილში ჩავარდა“, - აცხადებს ხურციძე.
რაც შეეხება, მტკიცებულებების განადგურების საკითხს, ადვოკატი აღნიშნავს, რომ მისი დაცვისქვეშ მყოფს, არანაირი მტკიცებულება არ გაუნადგურებია და არც შეეძლო ამის გაკეთება.
„ის არის უწესიერესი და უპატიოსნესი, მშრომელი ადამიანი, მას არანაირი კანონდარღვევა არ ჩაუდენია და აქედან გამომდინარე, მას არანაირი სურვილი არ შეიძლება გასჩენოდა, რომ სამხილი გაენადგურებინა. გადაწყვეტილებას გავასაჩივრებთ, რა თქმა უნდა იმიტომ, რომ არ ვეთანხმებით“, - განაცხადა ხურციძემ.
ცნობისთვის, განსაკუთრებულად მძიმე დანაშაულის შეუტყობინებლობაში ბრალდებულ თეიმურაზ ბაქრაძეს სასამართლომ აღკვეთის ღონისძიების სახით პატიმრობა შეუფარდა. დაცვის მხარე მის გათავისუფოლებას 3 000 ლარის სანაცვლოდ ითხოვდა.
