„ბრალდებული ამბობს, რომ ბავშვები მკვლელობის ფაქტს არ შესწრებიან და მას მკვლელობა მათი თანდასწრებით არ ჩაუდენია. რა თქმა უნდა, ბრალდებულს მკვლელობას დამამძიმებელ გარემოებებში ვედავებით, რაც ზუსტად იმას გულისხმობს, რომ მან არასრულწლოვანი შვილების თანდასწრებით ჩაიდინა აღნიშნული ქმედება
საქმის მასალებიდან ირკვევა, რომ მკვლელობის ადგილზე მცირეწლოვანი ბავშვები იყვნენ, რადგან ზუსტად ქალისა და ბავშვების კივილზე გაიგეს მეზობლებმა აღნიშნულის შესახებ და ამიტომ მივიდნენ იმ კართან“, - განაცხადა ჟურნალისტებტან, ბარნოვის ქუჩაზე 25 წლის თაკო გამრეკელაშვილის მკვლელობის საქმის პროკურორმა, იოსებ ხუციშვილმა.
მისი განმარტებით, ბრალდებულ ვეფხია ბაქრაძეს თაკო გამრეკელაშვილის მკვლელობა წინა საღამოს ჰქონდა დაგეგმილი.
„წინა საღამოს ზუსტად გარდაცვლილს დაემუქრა, მათ შორის, ბრალდებულსა და გარდაცვლილს შორის, სატელეფონო კომინიკაცია შედგა. დაძაბულობა იყო მათ შორის, რადგან გარდაცვლილი ხელს უშლიდა მათ ურთიერთობას იმ კუთხით, რომ დედამისს ეუბნებოდა, მოძალადეს არ შერიგებოდა და მასთან ერთად არ ეცხოვრა.
გარდაცვლილს თან ჰქონდა დედამისის ტელეფონი, ერთმანეთში გაცვალეს ტელეფონები და როცა დედამ თავისივე ტელეფონზე დარეკა, გარდაცვლილის დედას ბრალდებულმა უპასუხა. დაზარალებული რომ მიხვდა, რაღაცაში იყო საქმე, ვეფხია ბაქრაძეს ჰკითხა, თუ რატომ პასუხობდა მის მობილურს, რაზეც უპასუხა, რომ თაკო მიწაშია უკვეო“, - განაცხადა ხუციშვილმა.
რაც შეეხება, შემთხვევის ადგილზე ბენზინის აღმოჩენას, როგორც ბრალდებული აცხადებს, მას გარდაცვლილის დედის სამოსის დაწვა სრურა.
„ეს არის ერთ-ერთი ვერსია და ამაზე გამოძიება მუშაობს, სათანადო ექსპერტიზების პასუხების მიღების შემდეგ, მიეცემა შესაბამისი შეფასება. სახლიდან ამოღებულია თხევადი ნივთიერება, ბრალდებულის განმარტებით, ეს არის ბენზინი. თუმცა, დაზუსტებით ამის თქმა, სანამ ექსპერტიზის დასკვნას არ მივიღებთ, არ შეგვიძლია. ვეფხია ბაქრაძის განმარტებით უნდა დაეწვა გარდაცვლილის დედის ტანისამოსი და ნივთები“, - აცხადებს პროკურორი.
მისი განმარტებით, გარდაცვლილს სხეულის სხვადასხვა მიდამოებში აქვს ჭრილობები მიყენებული. როგორც ხუციშვილი აღნიშნავს, ყველა ის პირი, ვინც მხილებული იქნება ძალადობრივი დანაშაულის ჩადენაში, დაისჯება უმკაცრესად.
„თუ რამდენი ჭრილობა აქვს გარდაცვლილს, ამას ექსპერტიზა დაადგენს, თუმცა, შემიძლია გითხრათ, რომ მას მრავლობითი ჭრილობები აქვს სხეულის სხვადასხვა მიდამოებში... გამოძიება გრძელდება. ამ ეტაპზე მიმდინარეობს მტკიცებულების მოპოვების პროცესი, ასევე ექსპერტიზები. საგამოძიებო მოქმედებების დასრულების შემდეგ, საქმე გადაიგზავნება არსებითად განსახილველად. რაც შეეხება პროკურატურის მიდგომას, ყველა ის პირი, ვინც მხილებული იქნება ძალადობრივი დანაშაულის ჩადენაში, დაისჯება უმკაცრესად“, - აცხადებს ხუციშვილი.
შეგახსენებთ, მკვლელობაში ბრალდებულ ბაქრაძეს ბრალდება წარდგენილი აქვს საქართველოს სისხლის სამართლის კოდექსის 11 პრიმა 109-ე მუხლის მესამე ნაწილის "ბ" ქვეპუნქტით, რაც გულისხმობს ოჯახის ერთი წევრის მიერ, მეორე წევრის განზრახ მკვლელობას განსაკუთრებული სისასტიკით ჩადენილს. დანაშაული სასჯელის სახედ და ზომად 16-დან 20 წლამდე, ან უვადო თავისუფლების აღკვეთას ითვალისწინებს.
პროკურატურამ მძიმე დანაშაულის შეუტყობინებლობის ბრალდებით დააკავა ასევე, თიმურაზ ბაქრაძე. სასამართლო პროცესზე ბრალდება თეიმურაზ ბაქრაძის მიმართაც პატიმრობის შეფარდებას მოითხოვდა, რადგან პროკურორის თქმით, არსებობდა ვარაუდი, ნაკლებად მკაცრი აღკვეთის ღონისძიების შეფარდების შემთხვევაში ის, გამოძიებას მიმალვოდა.
ცნობისთვის, თეიმურაზ ბაქრაძე და თაკო გამრეკელაშვილის მკვლელობაში ბრალდებული ვეფხია ბაქრაძე ბიძაშვილ-მამიდაშვილები არიან. ის დანაშაულის შეუტყობინებლობისთვისაა დაკავებული. თეიმურაზ ბაქრაძის ადვოკატმა სასამართლოს მისი 3 000 ლარიანი გირაოს სანაცვლოდ გათავისუფლების შუამდგომლობით მიმართა.
ბარნოვის ქუჩაზე ახალგაზრდა ქალის მკვლელობაში ბრალდებული ბაქრაძე წარსულშიც იყო დაკავებული, თუმცა, მან პრეზიდენტის შეწყალების საფუძველზე საპატიმრო 2017 წლის 25 მაისს დატოვა.
მიმალვაში მყოფი ვეფხია ბაქრაძე შაბათს, თელეთში დააკავეს.
