შინაგან საქმეთა მინისტრის მოადგილე ნათია მეზვრიშვილის განცხადებით, ეფექტიანი აღსრულება და საზოგადოების უსაფრთხოების დაცვა ვერ მოხერხდება თუ ყველა შესაბამისი უწება, მათ შორის პრეზიდენტი მძიმე და განსაკუთრებით მძიმე დანაშაულთან მიმართებაში მკაცრ პოლიტიკას არ გაატარებს
მისივე თქმით, ბარნოვის ქუჩაზე მომხდარი მკვლელობისთვის დაკავებულს ბრალი დამამძიმებლ გარემოებებში ჩადენილი განსაკუთრებული სისასტიკით მკვლელობისთვის წარედგინა, რაც უვადო პატიმრობას ითვალისწინებს.
ამასთან, შს მინისტრის მოადგილის განმარტებით, სამინისტრო ოჯახში ძალადობის და ქალთა მიმართ ძალადობის ჩამდენი პირების მიმართ საკმაოდ მკაცრ პოლიტიკას ახორციელებს.
„პრაქტიკაში, აღსრულების პროცესში ეს ასეა – ბოლო პერიოდის სტატისტიკას თუ გადახედავთ, 800-ზე მეტი პირია დაკავებული ბოლო სამი თვის განმავლობაში და 1400-ზე მეტი შემაკავებელი ორდერიაგამოცემული, ანუ პრაქტიკა, ამ მიმართულებით ჩვენი მხრიდან გატარებული პოლიტიკა საკმაოდ მკაცრია. შემაკავებელი ორდერი საკმაოდ ეფექტური საშუალებაა იმისთვის, რომ მოძალადის ქცევის შეკავება და ძალადობის თავიდან არიდება მოახდინოს. თუმცა არსებობს შემთხვევები, როდესაც მხოლოდ შემაკავებელი ორდერი საკმარისი არ არის. ასეთი შემთხვევების დროს სათანადო იძულების ღონისძიებების გამოყენება ხდება. ეს იქნება დაკავება, აღკვეთის ღონისძიების სახით პატიმრობა თუ სხვა ღონისძიებები, რასაც კანონი ითვალისწინებს“, – განაცხადა მეზვრიშვილმა და აქვე აღნიშნა, რომ შემაკავებელი ორდერი საკმაოდ მნიშვნელოვანი ბერკეტია.
