თბილისის სააპელაციო სასამართლოში დღეს, 16 აპრილს, 13:00 საათზე გუდაურში სრიალის დროს გარდაცვლილი, 12 წლის სალომე ტატიშვილის საქმის განხილვაა ჩანიშნული.
სალომე ტატიშვილს სრიალისას 18 წლის გიორგი ლიპარტელიანი დაეჯახა. ის პირველი ინსტანციის სასამართლომ უდანაშაულოდ ცნო.
ბრალდების მხარემ სააპელაციო სასამართლოში, თბილისის საქალაქო სასამართლოს მიერ, გიორგი ლიპარტელიანის მიმართ გამოტანილი გამამტყუნებელი განაჩენი გაასაჩივრა.
წინა სხდომაზე სასამართლოს წინაშე მხარეები შესავალი სიტყვით წარსდგნენ. ბრალდების მხარემ თავის შესავალ სიტყვაში განაცხადა, რომ გიორგი ლიპარტელიანი თავიდანვე დიდი სიჩქარით ძალიან სწრაფად დაეშვა.მან ისაუბრა მოსამართლის მიერ გამოტანილ უსაფუძვლო განაჩენზეც.
დაცვის მხარე კი აცხადებს, რომ ბრალდების მხარემ სასამართლოში ბრალდების დამადასტურებელი უტყუარი მტკიცებულებების წარმოდგენა ვერ შეძლო. ლიპარტელიანის ადვოკატის, თენგიზ ხარებავას განმარტებით, ლიპარტელიანი სრიალისას მთვრალ მდგომარეობაში არ ყოფილა. მისი თქმით, ლიპარტელიანმა და მისმა მეგობრებმა გზაში პატარა კონიაკი იყიდეს და 100 გრამი დალიეს. ადვოკატი ხარებავა თავის შესავალ სიტყვაში აცხადებდა, რომ გიორგი ლიპარტელიანი არავის გაუფრთხილებია, რომ სასრიალო ტრასაზე ბავშვები სრიალებდნენ და იქ არც რაიმე გამაფრთხილებელი ნიშანი ყოფილა, რომ სრიალი შეზღუდული იყო.
ადვოკატის თქმით, ლიპარტელიანმა წაქცევის შედეგად გონება დაკარგა და დეტალები არ ახსოვს. ის წაქცევის შემდეგ განვითარებულ მოვლენებს დღემდე ვერ იხსენებს.
სალომე ტატიშვილის საქმეს სააპელაციო სასამართოლში მოსამართლეთა კოლეგია განიხილავს. პროცესებს თავად ლიპარტელიანი არ ესწრება. როგორც სასამართლო სხდომაზე მისმა ადვოკატმა განაცხადა, გიორგი ლიპარტელიანი ჩეხეთში სწავლობს და ის მისი ინტერესების დაცვას ადვოკატებს ანდობს.
ცნობისთვის, 12 წლის სალომე ტატიშვილს 2016 წლის 10 იანვარს გუდაურში, სრიალისას, თხილამურებზე მდგომი 18 წლის გიორგი ლიპარტელიანი დაეჯახა. მოზარდი სიცოცხლისთვის შეუთავსებელი ტრავმებით ადგილზე გარდაიცვალა, თავად ლიპარტელიანმა კი, მსუბუქი დაზიანებები მიიღო. ტატიშვილის გაურთხილებლობით სიცოცხლის მოსპობაში ბრალდებული, ლიპარტელიანი 2017 წლის 29 დეკემბერს თბილისის საქალაქო სასამართლომ უდანაშაულოდ ცნო. აღნიშნული გადაწყვეტილება მოსამართლე ბესიკ ბუგიანიშვილმა მიიღო.
