ორი დღის განმავლობაში ორჯერ შეცვლილი ჩვენება და დაწყებული ორი გამოძიება - ეს შედეგი ხორავას ქუჩაზე მომხდარი მკვლელობის საქმეზე დაკითხული მთავარი მოწმის, მიხეილ კალანდიას ჩვენებას მოჰყვა.
საქმის პროკურორის, ზვიად ფხაკაძის განცხადებით, გამოძიება დაწყებულია მოწმე მიხეილ კალანდიას მიერ გაჟღერებულ ინფორმაციაზე, რომლის მიხედვითაც წინა საგამოძიებო ეტაპზე მასსა და მამამისზე, თენგიზ კალანდიაზე ფსიქოლოგიური და ფიზიკური ზეწოლა განხორციელდა.
"ბრალდების მხარეს გააჩნია ინფორმაცია, რომ ხსენებულ მოწმესთან, დაცვის მხარის მხრიდან, ადვოკატებს არ ვგულისხმობ, გარკვეული პირების მხრიდან ადგილი ჰქონდა ზემოქმედების მოხდენის ფაქტს. აღნიშნულთან დაკავშირებით, მიმდინარეობს გამოძიება. წინა სხდომაზე როცა მოწმე დაიკითხა, მან ისაუბრა გარკვეულ პირთა მხრიდან მის მიმართ გამოძიების დროს განხორციელებულ ფსიქოლოგიურ ზემოქმედებაზე, ხოლო მამამისის მიმართ, შესაძლო ფიზიკური ზემოქმედების ფაქტებთან დაკავშირებით. მოწმის მიერ გაცხადებული ინფორმაცია რეაგირების გარეშე არ დარჩენილა და გამოძიება მყისიერად დაწყებულია სსკ-ის 333-ე მუხლით გათვალისწინებული დანაშაულის ნიშნით, რომელზეც გამოძიებას აწარმოებს მთავარი პროკურატურის საგამოძიებო ნაწილი. ვიმეორებ, მიუხედავად იმისა, რომ დღეს მოწმემ განაცხადა, რომ მის მიერ მიწოდებული ინფორმაცია, თითქოს ზემოქმედების ფაქტს ჰქონდა ადგილი, რეალობას არ შეესაბამება, ბრალდების მხარის მიერ მყისიერად მოხდა მოცემულ ფაქტთან დაკავშირებით გამოძიება",- აცხადებს ფხაკაძე.
რაც შეეხება ორი დღის განმავლობაში ორჯერ შეცვლილ ჩვენებას, როგორც პროკურორი აცხადებს, მოწმის დაკითხვა არ დასრულებულა, შესაბამისად, მან ჩვენება შეცვალა თუ არა, ამაზე საუბარი ნაადრევია.
"რაც შეეხება მოწმის მიერ ჩვენების შეცვლას, მისი დაკითხვა ჯერ არ დასრულებულა, შესაბამისად მოწმემ ჩვენება შეცვალა, თუ არ შეცვალა, ამაზე საუბარი საფუძველს მოკლებულია", - აცხადებს პროკურორი.
კითხვაზე, იმყოფებოდა თუ არა, მიხეილ კალანდიასთან სახლში ყოფილი პროკურორი, მირზა სუბელიანი სხვა ორ პროკურორთან ერთად, პროკურორი პასუხობს, რომ მოწმესთან პროკურატურის თანამშრომლებს კომუნიკაცია არ ჰქონიათ.
"მკაფიოდ, ცალსახად ვაცხადებ, რომ ხსენებულ მოწმესთან, იმ მომენტიდან როცა მან ჩვენების მიცემა სასამართლოში დაიწყო, დღემდე, ბრალდების მხარეს, მათ შორის მე, ასევე ჩემს კოლეგებს, პროკურატურის არცერთ თანამშრომელს, მათ შორის ტექნიკურ მუშაკსაც კი, მოწმესთან არანაირი კომუნიკაცია არ ჰქონია.ამაში როგორც ფიზიკურ კონტაქტს, ასევე სატელეფონო,ინტერნეტის საშუალებით კომუნიკაციას ვგულისხმობ. მირზა სუბელიანს ახლოს არ ვიცნობ. ის ვის ხვდება, ვისთან აქვს კონტაქტი, ამასთან დაკავშირებით ინფორმაცია არ გამაჩნია, რადგან ამ ადამიანთან კონტაქტი არ მაქვს. გამოვრიცხავ, რომ პროკურატურის მუშაკს მოწმესთან რაიმე სახის კომუნიკაცია ჰქონოდა. აღნიშნულის თქმის თაობაზე საკმაო საფუძველი მაქვს", - აცხადებს ფხაკაძე.