თურქულმა ავიაკომპანია AtlasGlobal-მა შესაძლოა საქართველო დატოვოს. გავრცელებული ინფორმაციით, ავიაკომპანია საქართველოს ბაზრიდან გადის.
AtlasGlobal-ის საქართველოს წარმომადგენლობაში კონკრეტული კომენტარს გაკეთებისგან თავს იკავებენ, თუმცა აცხადებენ, რომ აღნიშნულ საკითხთან დაკავშირებით ავიაკომპანია განცხადებას მოგვიანებით გაავრცელებს.
ტურისტულ კომპანიებში კი განმარტავენ, რომ მათ მაისისთვის გაყიდული ბილეთები გაუუქმეს და მალე გადახდილი თანხების უკან დაბრუნებესაც ელოდებიან.
მათივე ინფორმაციით, ბოლო პერიოდში AtlasGlobal-მა სტამბოლი-თბილისი-სტამბოლის მიმართულებაზე რეისების რაოდენობა შეამცირა.
სამოქალაქო ავიაციის სააგენტოს მიერ წარმოებული სტატისტიკური ინფორმაციის მიხედვით, 2017 წელს საქართველოში AtlasGlobal-ი 83 ათას 259 მგზავრს მოემსახურა.
გადაყვანილი მგზავრთნაკადის მიხედვით ავიაკომპანია 2017 წელს ქართული ავიაბაზრის 2%-ს ფლობდა. იგივე წილობრივი მაჩვენებელი უფიქსირდება ავიაკომპანიას 2016 წელსაც. 2015 წლის მონაცემებით კი AtlasGlobal-ი საქართველოს ავიაბაზრის 3%-ის მფლობელი იყო.
ავიაკომპანია Atlasglobal-ი 2001 წელს შეიქმნა. ის ბაზირებულია სტამბოლის ათათურქის საერთაშორისო აეროპორტში. 2015 წლამდე მუშაობდა Atlasjet-ის სახელით. AtlasGlobal-ი ფრენებს 50 მიმართულებით ასრულებს. კომპანიის 90%-ანი წილი Öger Holdings-ის მფლობელობაშია.