ფინანსთა სამინისტროს შემოსავლების სამსახურის ინფორმაციით, 2 აპრილს, 2017 წლის საანგარიშო პერიოდის, ფიზიკური პირის საშემოსავლო გადასახადის წლიური დეკლარაციის წარდგენის ვადა იწურება.
საშემოსავლო გადასახადის წლიურ დეკლარაციას წარადგენს ინდივიდუალური მეწარმე, მეწარმე ფიზიკური პირი (მაგალითად: სამეცნიერო, სამედიცინო, საადვოკატო ან სანოტარო, სააუდიტო მომსახურების განმახორციელებელი პირი) და ფიზიკური პირი (მაგალითად: ქონების გამქირავებელი, დიპლომატიური სტატუსის მქონე საერთაშორისო ორგანიზაციაში დასაქმებული პირი), რომელთა შემოსავალიც გადახდის წყაროსთან არ დაიბეგრა.
ამავე ვადაში, 2017 წლის საანგარიშო პერიოდზე მოგების გადასახადის დეკლარაციას წარადგენენ: საწარმოები/ორგანიზაციები, მათ შორის, კომერციული ბანკი, საკრედიტო კავშირი, სადაზღვევო ორგანიზაცია, მიკროსაფინანსო ორგანიზაცია, ლომბარდი და ეკონომიკური საქმიანობის განმახორციელებელი ორგანიზაცია.
ასევე, 2 აპრილს იწურება საწარმოს/ორგანიზაციის მიერ ქონების გადასახადის დეკლარაციის წარდგენის ვადა.
ზემოაღნიშნული პირები საშემოსავლო, მოგების, ქონების (გარდა მიწისა) გადასახადს იხდიან არა უგვიანეს მიმდინარე წლის 2 აპრილისა.