უკრაინის ნაციონალურ ტექნიკურ უნივერსიტეტში, საქართველოს ელჩმა გელა დუმბაძემ წაიკითხა ლექცია, რომელიც საქართველოს პირველი დემოკრატიული რესპუბლიკის და საქართველო-უკრაინას შორის დიპლომატიური ურთიერთობების დამყარების 100 წლის იუბილეებს მიეძღვნა. გელა დუმბაძე უნივერსიტეტს რექტორ მიხეილ ზგუროვსკის მიწვევით ესტუმრა.
რექტორთან ორმხრივ შეხვედრაზე განხილულ იქნა განათლების და მეცნიერების სფეროში საქართველოსა და უკრაინას შორის ურთიერთობების გააქტიურების, საქართველოს რეფორმების გამოცდილების გაზიარების და სტუდენტებთან უფრო მჭიდრო თანამშრომლობის დამყარების საკითხები.
ლექციაზე ელჩმა ისაუბრა ისეთ თემებზე, როგორიცაა საქართველო-უკრაინის ურთიერთობების დინამიკა, ორი ქვეყნის მიერ არჩეული ევროპული და ევროატლანტიკური ინტეგრაციის საკითხები. ყურადღება გამახვილდა ევროპული ინტეგრაციის გზაზე საქართველოსა და უკრაინის პროგრესზე და ამ მიმართულებით თანამშრომლობის საკითხებზე.
ელჩმა სტუმრებს ინფორმაცია მიაწოდა საქართველოს ოკუპირებულ რეგიონებში არსებულ მძიმე ვითარებაზე და ბოლო ტრაგიკულ შემთხვევაზე,რომელიც არჩილ ტატუნაშვილის მკვლელობას უკავშირდება.
გელა დუმბაძემ სტუდენტებს გააცნო საქართველოს პარლამენტის მიერ "რუსეთის ფედერაციის მიერ ოკუპირებულ აფხაზეთსა და ცხინვალის რეგიონში ადამიანის უფლებების უხეში დარღვევისა და "ოთხოზორია-ტატუნაშვილის სიის“ შესახებ“ მიღებული რეზოლუცია.
ლექციის შემდეგ, ელჩმა სტუდენტების მიერ დასმულ შეკითხვებს უპასუხა.