სახელმწიფო აუდიტის სამსახურის ანალიტიკურ ვებპლატფორმას ავსტრიაში ქ. ვენაში, მსოფლიო სამიტის ჯილდოს (World Summit Awards“) გლობალურ კონგრესზე, 2017 წლის WSA გამარჯვებულის დიპლომი და სპეციალური პრიზი გადაეცა.
ვებპლატფორმამ პრიზი საკონკურსო კატეგორიაში - „მთავრობა და მოქალაქეთა ჩართულობა“ მიიღო. „ბიუჯეტის მონიტორი“ ჟიურისა და მონაწილეების მიერ შეფასდა როგორც „მსოფლიოს ერთ-ერთ საუკეთესო ინოვაციური ციფრული გამოგონება“.
სამიტის ფარგლებში, ანალიტიკური ვებპლატფორმის - „ბიუჯეტის მონიტორის“ პრეზენტაცია სახელმწიფო აუდიტის სამსახურის ანალიტიკოსმა გიორგი ჩაკვეტაძემ გამართა.
WSA სამდღიან კონგრესში - „სოციალური ზეგავლენა ციფრული ინოვაციების საშუალებით“ მსოფლიოს 120 ქვეყნის საერთაშორისო ექპერტები, ციფრული ტექნოლოგიების სპეციალისტები, სამთავრობო და ბიზნეს სექტორის წარმომადგენლები მონაწილეობდნენ.
მსოფლიო სამიტის ჯილდო (WSA) გაეროს მსოფლიო სამიტის ფარგლებში 2003 წელს დაფუძნდა. მისი მიზანია მდგრადი განვითარების ხელშეწყობა, თანამედროვე ტექნოლოგიების მხარდაჭერა და ინოვაციური სოციალური პროექტების დაჯილდოვება მთელი მსოფლიოს მასშტაბით.
სახელმწიფო აუდიტის სამსახურის ვებპლატფორმა „ბიუჯეტის მონიტორი“ წარმოადგენს ანალიტიკურ პორტალს, რომელიც დაინტერესებულ მხარეებს საშუალებას აძლევს მიიღონ საჯარო რესურსების მართვასთან დაკავშირებული ინფორმაცია მარტივად აღქმადი ვიზუალიზაციების საშუალებით და დაუყოვნებლივ მიიღონ მუდმივად განახლებადი და სანდო ინფორმაცია სახელმწიფო შემოსავლების, ხარჯების, ვალის, ინფრასტრუქტურული პროექტების, პროგრამული ბიუჯეტის, შესყიდვების შესახებ.