მივიღებთ ყველა ზომას, რათა მოხდეს მათი დასჯა, ვინც გიორგი ზურაბიშვილს სოციალურ ქსელში ემუქრება, - ამის შესახებ საქართველოს შინაგან საქმეთა სამინისტროში აცხადებენ.
უწყების ინფორმაციით, მოქალაქე გიორგი ზურაბიშვილმა სოციალურ ქსელში გაავრცელა ინფორმაცია, რომ მას ერთ-ერთი მეგობრის მიმართ თანაგრძნობის გამოხატვისთვის ემუქრებიან, რის საფუძველზეც, შინაგან საქმეთა სამინისტროს გენერალური ინსპექცია მას უკვე დაუკავშირდა.
„გიორგი ზურაბიშვილმა მზადყოფნა გამოთქვა ითანამშრომლოს შინაგან საქმეთა სამინისტროსთან, თავის მხრივ სამინისტრო მზადაა, მიიღოს ყველა საჭირო ზომა, რათა იდენტიფიცირებული იქნას ყველა შესაძლო კანონდამრღვევი და მოხდეს მათი დასჯა”, – აღნიშნავენ უწყებაში.
შეგახსენებთ, ნარკოპოლიტიკაზე გამოთქმული მოსაზრებების გამო, საზოგადოებრივი მაუწყებლის ჟურნალისტმა, გიორგი ზურაბიშვილმა განაცხადა, რომ მას ემუქრებიან.