“რუსთავი 2”-თან მომხდარი ინციდენტის ფაქტზე მიმდინარე გამოძიების ფარგლებში დღეს სანდრო ბრეგაძე გამოიკითხა, რის შემდეგაც მან პოლიციის შენობა დატოვა.
შსს-ს ინფორმაციით, სანდრო ბრეგაძემ ამ ეტაპზე გამოძიებასთან ითანამშრომლა, თუმცა გამოძიება გრძელდება და გამოძიების ინტერესებიდან გამომდინარე, უახლოეს დღეებში, ის პოლიციაში კვლავ იქნება დაბარებული გამოსაკითხად.
ბრეგაძე სამართალდამცავ უწყებაში ღუდუშაურის სახელობის კლინიკიდან მიიყვანეს. კლინიკაში სანდრო ბრეგაძე თავისი სურვილით განთავსდა. ღუდუშაურის სახელობის კლინიკის ექიმის, ნინო აქიაშვილის განცხადებით, სანდრო ბრეგაძე საავადმყოფოში საკუთარი სურვილით მოათავსდა. „პაციენტის მდგომარეობა ამჟამად დამაკმაყოფილებელია. არ აღენიშნება გარეგანი დაზიანებები და ტრავმის კვალი. პაციენტი თავისი მოთხოვნით მოთავსებულია ჩვენს კლინიკაში“, - განაცხადა ექიმმა ნინო აქიაშვილმა.
ცნობისთვის, 19 მარტს, „ქართული მარშის“ წევრებმა ტელეკომპანია „რუსთავი2“-თან აქცია გამართეს. აქციის მონაწილეებმა ჟურნალისტ გიორგი გაბუნიას გზა გადაუკეტეს და აცხადებდნენ, რომ ქრისტიანებისთვის შეურაცხმყოფელი განცხადების გამო, მან ბოდიში უნდა მოიხადოს. მომხდართან დაკავშირებით, შსს-მ 6 პირი დააკავა. ბრალის დამტკიცების შემთხვევაში მათ 2-დან 5 წლამდე თავისუფლების აღკვეთა ემუქრებათ.
