მსახიობ გიორგი გიორგანაშვილის, იგივე „ბახალას“ სასამართლო პროცესი თბილისის სააპელაციო სასამართლოში 10 აპრილს, 15:00 საათზე გაიმართება. აღნიშნული ინფორმაცია, „ჯი-ეიჩ-ენს“ გიორგანაშვილის ადვოკატმა, გიორგი მახარაძემ მიაწოდა.
მან სააპელაციოში თბილისის საქალაქო სასამართლოს გამამტყუნებელი განაჩენი გაასაჩივრა, რომლის მიხედვითაც, „ბახალას“ 8 წლით თავისუფლების აღკვეთა მიესჯა.
დაცვის მხარე მიიჩნევს, რომ მოსამართლემ აღნიშნული განაჩენი ვერ დაასაბუთა. ადვოკატიც და მსჯავრდებულიც, მეორე ინსტანციის სასამართლოსგან გამამართლებელი განაჩენის მოლოდინშია.
შეგახსენებთ, რომ გიორგი გიორგანაშვილი გასული წლის 25 იანვარს დააკავეს. სასამართლომ ის 14 ივლისს 20 000-ლარიანი გირაოს სანაცვლოდ გაათავისუფლა.
23 იანვარს კი, ის პირდაპირ სასამართლოს დარბაზშივე დააკავეს, მოსამართლემ გიორგანაშვილს რვა წლით თავისუფლების აღკვეთა მიუსაჯა. გამოძიება მას განსაკუთრებით დიდი ოდენობით ნარკოტიკული საშუალების, „ბუპრენორფინის“ შემცველი 45 აბის და 4 აბის ნატეხის პირადი მოხმარების მიზნით შეძენა-შენახვას ედავებოდა.