მერიის ყოფილი მაღალჩინოსანის, ოთარ აბესაძის სასამართლო პროცესზე დღეს მერიის თანამშრომლები დაიკითხებიან. აღნიშნულის შესახებ "ჯი-ეიჩ-ენს" პროკურორმა ირაკლი მარშანიამ განუცხადა.
"დღევანდელ სასამართლო პროცესზე მერიის თანამშრომლები დაიკითხებიან, რომელთა ჩვენებებითაც დადასტურდება, რომ ოთარ აბესაძე დაინტერესებული იყო დახმარებოდა მისთვის სასურველ პირებს მერიიდან შესაბამისი ნებართვების აღებაში. ქრთამის პირდაპირ აღებას დაადასტურებს ის მოწმე, ვისაც აბესაძემ თანხა გამოართვა", - აცხადებს მარშანია.
ცნობისთვის, მერიის ყოფილი თანამშრომელი, ოთარ აბესაძე თბილისის საქალაქო სასამართლომ 15 იანვარს, 10 000 ლარიანი გირაოს სანაცვლოდ გაათავისუფლა. აბესაძე ქრთამის აღების ბრალდებით სუს-მა გასული წლის 12 ივლისს დააკავა. გამოძიების თანახმად, აბესაძემ მდინარე მტკვარზე, გარკვეული კონსტრუქციის აშენებისთვის საჭირო ნებართვის მისაღებად და ნებართვის მიღებამდე მშენებლობის წარმოების მფარველობის სანაცვლოდ მოქალაქეს 3 ათასი დოლარი ქრთამის სახით გამოართვა.