„ქურდული სამყაროს” წევრის, ან „კანონიერი ქურდისთვის” მიმართვა დღეს დანაშაული არ არის, მაგრამ მას შემდეგ, რაც ამ კანონს პარლამენტი მიიღებს, თუ პირი დავის გადაწყვეტის მიზნით „ქურდული სამყაროს” წევრს ან „კანონიერ ქურდს” მიადგება, სისხლის სამართლის წესით დაისჯება, - ამის შესახებ შინაგან საქმეთა მინისტრის მოადგილე ნათია მეზვრიშვილმა ე.წ ქურდული სამყაროს კანონპროექტის შესახებ საუბრისას განაცხადა.
მისი განმარტებით, ამ კანონპროექტის მთავარი სამიზნეები „ქურდული სამყაროს” წევრები და ე.წ. კანონიერი ქურდები არიან. მისივე თქმით, ამ მიმართულებით დღეს რაც მძიმე კატეგორიის დანაშაულია, ხვალ განსაკუთრებით მძიმე კატეგორიის გახდება
„ქმედება, რომელსაც ნებისმიერი პირი ამ სამყაროს ფინანსური, მატერიალური თუ სხვა ტიპის მხარდასაჭერად განახორციელებს, სისხლის სამართლის წესით დაისჯება. გარდა ამისა, მნიშვნელოვნად იზრდება არსებული სანქციები. მოქმედი კანონმდებლობით, „ქურდული სამყაროს” წევრისთვის სასჯელი 5-დან 8 წლამდეა. ეს ვადა 7-დან 10 წლამდე გაიზრდება, ხოლო ე.წ. კანონიერი ქურდისთვის- 9-დან 15 წლამდე. დღეს რაც მძიმე კატეგორიის დანაშაულია, ხვალ განსაკუთრებით მძიმე კატეგორიის გახდება”, – განაცხადა ნათია მეზვრიშვილმა, რომელმაც აქვე აღნიშნა, რომ სანქციები საკმაოდ მკაცრია, თუმცა მხარდაჭერა ორივე კომიტეტში მოიპოვა.