საპარლამენტო უმრავლესობის ლიდერი არჩილ თალაკვაძე წინადადებით გამოდის, საქართველოს პარლამენტის რეზოლუციას, გიგა ოთხოზორიასა და არჩილ ტატუნაშვილთან ერთად, დავით ბაშარულთან დაკავშირებული ჩანაწერი დაემატოს.
მისი თქმით, უპრიანი და მიზანშეწონილი იქნება, პარლამენტის რეზოლუციაში გიგა ოთხოზორიასა და არჩილ ტატუნაშვილის გვერდით იყოს დავით ბაშარულის შემთხვევაც.
მან ასევე კომიტეტის წევრებს შესთავაზა, რეზოლუციის ტექსტში სიტყვა „მკვლელობა“ შეიცვალოს ჩანაწერით – „სიცოცხლის ხელყოფა“.
ცნობისთვის, მთავრობამ პარლამენტს ოკუპირებულ ტერიტორიებზე საქართველოს მოქალაქეთა მკვლელობაში, გატაცებაში, წამებაში, არაჰუმანურ მოპყრობასა და ჯანმრთელობის მძიმე დაზიანებაში, ასევე ამ დანაშაულთა დაფარვაში ბრალდებულ და მსჯავრდებულ პირთა სია –„ოთხოზორია-ტატუნაშვილის სია“ 2018 წლის 15 ივნისამდე უნდა წარუდგინოს.
საკანონმდებლო ორგანო აღმასრულებელ ხელისუფლებას აღნიშნულ ვალდებულებას არჩილ ტატუნაშვილთან დაკავშირებით მომზადებული რეზოლუციის პროექტით აკისრებს, რომელსაც დეპუტატები კენჭს 21 მარტის პლენარულ სხდომაზე უყრიან.
