თბილისის სააპელაციო სასამართლო სალომე ტატიშვილის დაღუპვის საქმის განხილვას დღეიდან იწყებს. ბრალდების მხარემ საქალაქო სასამართლოს გამამართლებელი განაჩენი გაასაჩივრა.
სპორტსკოლის მოსწავლეს, 12 წლის სალომე ტატიშვილს 2016 წლის იანვარში გუდაურში, სრიალისას, თხილამურებზე მდგომი გიორგი ლიპარტელიანი დაეჯახა. მოზარდი სიცოცხლისთვის შეუთავსებელი ტრავმებით ადგილზე გარდაიცვალა, თავად ლიპარტელიანმა კი, მსუბუქი დაზიანებები მიიღო.
ტატიშვილის გაურთხილებლობით სიცოცხლის მოსპობაში ბრალდებული, 18 წლის გიორგი ლიპარტელიანი 2017 წლის 29 დეკემბერს თბილისის საქალაქო სასამართლომ გაამართლა. აღნიშნული გადაწყვეტილება მოსამართლე ბესიკ ბუგიანიშვილმა მიიღო.
მოსამართლეს განაჩენში უწერია, რომ კანონმდებლობით, თხილამურით სრიალის მაქსიმალური სიჩქარე არ რეგულირდება, შესაბამისად სპორტის ეს სახეობა ექსტრემალურია და ტრავმები მოსალოდნელია.
გოგონას ოჯახის განცხადებით, ლიპარტელიანი ნასვამ მდგომარეობაში სრიალებდა, ეს ფაქტი ლიპარტელიანის მეგობრებმა ჩვენებებშიც დაადასტურეს. თუმცა, ექსპერტიზის დასკვნაში მისი სიმთვრალე არ დადასტურდა.
დაზარალებულის ინტერესებს ახალგაზრდა იურისტთა ასოციაცია იცავს. ასოციაციის წარმომადგენელი აცხადებს, რომ ლიპარტელიანის ბრალეულობა საქმეში არსებული მასალებით და მოწმეთა ჩვენებებით დასტურდება, რაც მოსამართლემ არ გაითვალისწინა.
პროცესი სააპელაციო სასამართლოში 14:00 საათზეა ჩანიშნული. პროცესის პარალელურად, დაღუპული გოგონას ოჯახის წვერები სასამართლოს ეზოში აქციას გამართავენ.