ხორავას ქუჩაზე მოზარდებს შორის მომხდარი მკვლელობის საქმის ერთ-ერთი ადვოკატი, ტარიელ კაკაბაძე აცხადებს, რომ დღეს დაკითხულმა მოწმემ სასამართლოს მნიშვნელოვანი ინფორმაცია მიაწოდა და რომ მისი ჩვენება აქამდე დაკითხულ სხვა მოწმეთა ჩვენებებთან შინაარსობრივად წინააღმდეგობაში მოდის.
„დღეს დაკითხული მოწმის ჩვენება მნიშვნელოვანია იმ ნაწილში, რა ნაწილშიც ის საუბრობს თუ რა უძღვოდა წინ კონფლიქტის დაწყებას და როგორ განვითარდა მოვლენები როცა კონფლიქტი დასრულდა. აღნიშნული მოწმის ჩვენება რიგ დეტალებთან მიმართებაში შეცვლილია. მან ფაქტობრივად გარკვეული დეტალები უარყო. მისი ჩვენება მნიშვნელოვანია, რადგან ის სხვა მოწმეთა ჩვენებებს კატეგორიულად ეწინააღმდეგება. ეს დაგვეხმარება დავამტკიცოთ სასამართლოში რომ ის მოწმეები, რომლებიც შინაარსობრიბად განსხვავებულ ჩვენებებს აძლევენ, სასამართლოს ცრუ ინფორმაციას აწვდიან. შესაძლოა აღნიშნულ მოწმეს არ დაუნახავს თუ როგორ დაჭრეს კონკრეტულ პიროვნება, თუმცა მის მიერ გაჟღერებული დეტალები მნიშვნელოვანია და მას დასკვნით სიტყვაში აუცილებლად გამოვიყენებთ“ - განაცხადა ჟურნალისტებთან სასამართლო პროცესის შემდეგ ადვოკატმა ტარიელ კაკაბაძემ.
შემდეგი სასამართლო პროცესი 26 მარტს ჩაინიშნა.
შეგახსენებთ, რომ ხორავას ქუჩაზე, 2017 წლის პირველ დეკემბერს ორი მოზარდი დაჭრეს. ერთი მათგანი, ლევან დადუნაშვილი საავადმყოფოში მიყვანამდე გარდაიცვალა, მეორე - დავით სარალიძე კი, მოგვიანებით, საავადმყოფოში. მომხდარი მკვლელობის ფაქტზე სამართალდამცავებმა 2 დეკემბერს, ერთი არასრულწლოვანი დააკავეს და ბრალი განზრახ მკვლელობის მუხლით წაუყენეს. მეორე არასრულწლოვანს კი ბრალი დაუსწრებლად წარუდგინეს. სასამართლომ ორივე ბრალდებულს აღკვეთის ღონისძიების სახით, პატიმრობა შეუფარდა. პროკურატურამ მკვლელობის საქმეზე, დანაშაულის შეუტყობინებლობის ბრალდებით პასუხისგებაში 5 პირი მისცა, რომელთა შორის, ორი მოსწავლის მშობელი და შსს-ს ყოფილი თანამშრომელია. პასუხისგებაში მიცემულთაგან მხოლოდ სამი დააკავეს, რადგან ორ პირზე არასრულწლოვანთა მართლმსაჯულების კოდექსი ვრცელდება.