ხორავას ქუჩაზე მოზარდებს შორის მომხდარი მკვლელობის საქმეზე ერთ-ერთი ბრალდებულის ადვოკატი, ტარიელ კაკაბაძე აცხადებს, რომ დღეს დაკითხულმა მოწმემაც შესაძლოა ჩვენება შეცვალოს.
"ვინაიდან აბსოლუტურად ყველა მოწმემ არსებითად შეცვალა გამოძიებსითვის მიცემული ჩვენება, გვაქვს მოლოდონი, რომ სავარაუდოდ, დღევანდელი მოწმეც არსებითად შეცვლის გამოძიებისთვის მიცემულ ჩვენებას. ვინაიდან, სასამართლოში ყველა მოწმის მიერ მიცემული ჩვენებები შინაარსობრივად განსხვავებული იყო, ასევე მიგვაჩნია რომ დღევანდელი მოწმის ჩვენებაც წინააღმდეგობაში აღმოჩნდება სასამართლოში დაკითხულ სხვა მოწმეთა ჩვენებებთან. ის ფაქტი რომ მოწმეები ჩვენებებს არსებითად ცვლიან, იმაზე მიუთითებს რომ გამოძიება სრულყოფილად და ობიექტურად ჩატარებული არ არის, გამოძიება ცალმხრივადაა ჩატარებული და არასწორად გამოძიებული სისხლის სამართლის საქმე გადაეცა სასამართლოს განსახილველად. მოწმეები გულწრფელი არ არიან, როცა ადამიანი სიმართლეს ჰყვება, რამდენჯერაც არ უნდა მოყვეს ერთიდაიგივე, ის მიახლოებით მაინც იგივეს იტყვის. როცა ჩვენებები არათანმიმდევრულია, როცა არსებობს უამრავი გარემოება რომელიც ბრალდების მხარეს არ დაუდგენია, რჩება ეჭვი რომ ვიღაც პიროვენებებს გარკვეული პირები ხელს აფარებენ", - აცხადებს კაკაბაძე.
"ჯი-ეიჩ-ენთან" ინტერვიუში ზაზა სარალიძის მიერ გაჟღერებულ ინფორმაციაზე, რომ შესაძლოა ექსპერტები მოისყიდონ, კაკაბაძე აცხადებს, რომ ექპერტების შედეგები არც მისთვისაა სანდო. "ვინაიდან გამოძიება სრულყოფილად არ იყო ჩატარებული, გამოძიების მიერ მოპოვებული ექსპერტიზის შედეგებს ვერ ვენდობით" - დასძენს ადვოკატი.
შეგახსენებთ, რომ ხორავას ქუჩაზე, 2017 წლის პირველ დეკემბერს ორი მოზარდი დაჭრეს. ერთი მათგანი, ლევან დადუნაშვილი საავადმყოფოში მიყვანამდე გარდაიცვალა, მეორე - დავით სარალიძე კი, მოგვიანებით, საავადმყოფოში. მომხდარი მკვლელობის ფაქტზე სამართალდამცავებმა 2 დეკემბერს, ერთი არასრულწლოვანი დააკავეს და ბრალი განზრახ მკვლელობის მუხლით წაუყენეს. მეორე არასრულწლოვანს კი ბრალი დაუსწრებლად წარუდგინეს. სასამართლომ ორივე ბრალდებულს აღკვეთის ღონისძიების სახით, პატიმრობა შეუფარდა. პროკურატურამ მკვლელობის საქმეზე, დანაშაულის შეუტყობინებლობის ბრალდებით პასუხისგებაში 5 პირი მისცა, რომელთა შორის, ორი მოსწავლის მშობელი და შსს-ს ყოფილი თანამშრომელია. პასუხისგებაში მიცემულთაგან მხოლოდ სამი დააკავეს, რადგან ორ პირზე არასრულწლოვანთა მართლმსაჯულების კოდექსი ვრცელდება.
