„ეს არ იყო პირადი ცხოვრების გაჟღერება, ეს იყო საქმის მასალიდან ძალიან, ძალიან კორექტულად ნათქვამი ფრაზა. მინდა გთხრათ, რომ უფრო მეტიცაა, მაგრამ ძალიან კორექტულად გავაჟღერე, მეტი არაფრის თქმა შემიძლია“, - ასე გამოეხმაურა „ჯი-ეიჩ-ენთან“ შეყვარებულის მკვლელობაში ბრალდებულის, ლადო გრიგალაშვილის ადვოკატი, ნაირა ოტიაშვილი, ადვოკატთა ასოციაციის თავმჯდომარის, დავით ასათიანის განცხადებას.
ცნობისთვის, დავით ასათიანი ოტიაშვილის საჯარო განცხადებებს გამოეხმაურა, რომელშიც ადვოკატი გარდაცვლილ ანა ნაცვლიშვილსა და სხვა პირს შორის ინტიმურ ურთიერთობაზე საუბრობდა. ასათიანის შეფასებით, ადვოკატის მხრიდან მსხვერპლის პირადი ცხოვრების დეტალების საჯაროდ გავრცელება მიუღებელია.
შეგახსენებთ, რომ 22 თებერვალს, თემქაზე 21 წლის ანა ნაცვლიშვილის ცხედარი იპოვეს. შსს-მ მომხდარზე გოგონას შეყვარებული, ლადო გრიგალაშვილი დააკავა. უწყების ინფორმაციით, მკვლელობა შურისძიების ნიადაგზე მოხდა.