საქართველოდან გატაცებული ჟურნალისტის, აფგან მუხთარლის საქმეზე საგამოძიებო კომისიის შექმნის ინიციატივას საქართველოს პარლამენტმა მხარი არ დაუჭირა.
საპარლამენტო უმცირესობის მიერ ინიცირებულ დადგენილების პროექტს 18-მა დეპუტატმა დაუჭირა მხარი. კომისიის შექმნის წინააღმდეგ ხმა პარლამენტის 22-მა წევრმა მისცა.
უმცირესობის მიერ მომზადებული პროექტი აფგან მუხთარლიზე თავდასხმის, გატაცების, თავისუფლების უკანონოდ აღკვეთისა და საქართველოს სახელმწიფო საზღვარზე უკანონოდ გადაყვანის ფაქტის შესწავლის მიზნით დროებითი საგამოძიებო კომისიის შექმნას ითვალისწინებდა.
"ევროპული საქართველოს" წევრი ელენე ხოშტარია მიიჩნევდა, რომ პარლამენტის ღირსების საკითხია, განახორციელოს საპარლამენტო კონტროლი და აფგან მუხთარლის საქმეზე საგამოძიებო კომისია შექმნას.