აჭარის ფინანსთა და ეკონომიკის მინისტრის მოადგილე კონსტანტინე მეგრელიშვილი მინისტრის მრჩეველ თინათინ ზოიძესთან ერთად გერმანელ ექსპერტებს შეხვდა. შეხვედრაზე საუბარი გერმანული მხარისა და აჭარის სავაჭრო-სამრეწველო პალატის თანამშრომლობის სამომავლო გეგმებს შეეხო.
მინისტრის მოადგილემ უცხოელ სტუმრებს სამინისტროსა და აჭარის სავაჭრო-სამრეწველო პალატის ერთობლივი საქმიანობის ფარგლებში დაგეგმილი პროექტები და სიახლეები გააცნო. შეხვედრაზე მხარეებმა საქართველოში გერმანიის მთავრობის პროექტის ფარგლებში ბიზნესგაერთიანებების მხარდაჭერის მე-2 ეტაპის დაწყებაზე ისაუბრეს. პროექტი ქვეყნის სავაჭრო პალატის შემდეგ უკვე რეგიონალური პალატების ბიზნესგაერთიანებების შესაძლებლობების გაძლიერებას და მათი სერვისების დახვეწის მხარდაჭერას ითვალისწინებს.
გერმანიის ხელისუფლება საქართველოში „სავაჭრო-სამრეწველო პალატებისა და ასოციაციების ხელშეწყობის“ პროგრამის ფარგლებში სხვადასხვა პროექტს უკვე 25 წელია ახორციელებს. ამ ეტაპზე 60 სხვადასხვა სახელმწიფო პროგრამა უკვე მიმდინარეობს.
შეხვედრას აჭარის ა.რ. სავაჭრო-სამრეწველო პალატის თავმჯდომარე თამაზ შავაძე, ექსპერტი ოლფგან დიურიჰი - კომპანია „RWI“ წარმომადგენელი, რაინერ კლიუზნერი - კომპანია Sequa gGmbH პროექტის დირექტორი; კრისტიან კოდრანუ-საერთაშორისო ტრენინგის ხელმძღვანელი ესწრებოდნენ.
