"ევროპული საქართველოს" წევრის, ირაკლი აბესაძის შეფასებით, შრომის უსაფრთხოების შესახებ დაგეგმილ ცვლილებებზე, მმართველი გუნდის მიდგომა არის ფორმალური და სრულიად არათანმიმდევრული.
აბესაძის განმარტებით, თბილისში სამშენებლო სფეროში შრომის უსაფრთხოების წესების დარღვევაზე 30 000-ლარიან ჯარიმის დაწესება, ხოლო ყველა სხვა ქალაქში 500 ლარიანი, იმიტომ გადაწყდა, რომ ამით გაპიარება თბილისის მერმა მოინდომა.
"მშენებლობის უსაფრთხოების წესების დარღვევაზე ჯარიმა 60-ჯერ უფრო მაღალი იქნება თბილისში, ვიდრე ქუთაისში, რადგან ამაზე პიარი თბილისის მერმა მოინდომა?! თუკი შრომის უსაფრთხოების წესების დარღვევა მართლა გვანაღვლებს და თუკი თბილისის შემთხვევაში 30 ათასი ლარით ისჯება, რატომ არ შედის ცვლილება სხვა ქალაქებისთვის და მათთვის ჯარიმა პროპორციულად რატომ არ იზრდება", - განაცხადა აბესაძემ.
უმრავლესობაში განმარტავენ, რომ მშენებლობების 70%-ზე მეტი სწორედ თბილისზე მოდის და პრობლემა თბილისისთვის ყველაზე უფრო აქტუალურია, რის გამოც თბილისის მერიას მშენებლობის უსაფრთხოების წესების დარღვევაზე ჯარიმების გაზრდის სურვილი გაუჩნდა.
მათივე თქმით, მნიშვნელოვანია სტანდარტების უნიფიცირება და ქვეყნის მასშტაბით ერთიანი ჯარიმების დაწესება.