თადარიგის პოლკოვნიკის, დოდო გუგეშაშვილის ადვოკატის, გელა ნიკოლაიშვილის განმარტებით, გამოძიებას მომხდართან დაკავშირებით სიახლეები არ აქვს. საგამოძიებო უწყებას დამნაშავე ამ დრომდე არ დაუკავებია.
„როგორც მე ვიცი, ახალი არაფერია. შესაძლოა, არის კიდეც, მაგრამ გამოძიების დეტალები ჩვენ არ ვიცით“, - განუცხადა „ჯი-ეიჩ-ენს“ გელა ნიკოლაიშვილმა.
დოდო გუგეშაშვილი ღუდუშაურის კლინიკიდან დღეს გაწერეს.
„რა თქმა უნდა, ბრძოლას განაგრძობს, მას დაზარალებულის სტატუსი აქვს და ბუნებრივია, ამ სტატსუსის მქონე პირს რა უფლებებიც აქვს, იმ უფლებებით მაქსიმალურად ისაგებლებს“, - აცხადებს უფლებადამცველი.
გუგეშაშვილის ადვოკატისთვის უცნობია, საგამოძიებო ორგანო მის გამოკითხვას კვლავ გეგმავს თუ არა.
„როცა დაიკითხა, მან გამოძიებას ამომწურავი ინფორმაცია მიაწოდა. თუ დაკითხვა საჭირო გახდება, წინასწარ შეგვატყობინებენ“, - აღნიშნა ადვოკატმა.
შეგახსენებთ, რომ დოდო გუგეშაშვილსა და მის ვაჟზე შეიარაღებული თავდასხმა 7 თებერვალს მოხდა. ცეცხლსასროლი იარაღით მიყენებული ჭრილობის შედეგად დოდო გუგეშაშვილი გულ-მკერდის არეში დაიჭრა, ხოლო მისი შვილი ნოდარ გუგეშაშვილი ადგილზევე გარდაიცვალა.