საქართველოს ეკონომიკისა და მდგრადი განვითარების სამინისტროს, სააგენტოს „აწარმოე საქართველოში“ ფარგლებში მხარდაჭერილი ბენეფიციარების რიცხვს კიდევ ერთი კომპანია, შპს „სინენსის“ შეემატა, რომელიც მინერალური წყლის ჩამოსხმას შეძლებს.
აღსანიშნავია, რომ სააგენტოს „აწარმოე საქართველოში“ ფინანსებზე ხელმისაწვდომობის კომპონენტის ფარგლებში, კომპანია უახლესი ტექნოლოგიის დანადგარების შეძენას შეძლებს, რაც მას საშუალებას მისცემს მომხმარებელს მაღალხარისხიანი, ეკოლოგიურად სუფთა პროდუქცია, ხელმისაწვდომ ფასად მიაწოდოს.
შპს „სინენსის“, რომელიც 2018 წლის ივლისის თვეში ამოქმედდება, წლიურად 100 000-ზე მეტი ბოთლის წარმოებას შეძლებს. საწარმოს პირელ ეტაპზე 25 ადამიანს დაასაქმებს და საკუთარი პროდუქციის რეალიზაციას პირველ რიგში ადგილობრივ ბაზარზე აპირებს, თუმცა სამომავლოდ წარმოებული პროდუქციის ასორტიმენტის გაზრდასთან ერთად, ექსპორტზე გატანასაც გეგმავს.
აღნიშნული საწარმო, რომელიც მცხეთაში, სოფელ მუხრანში აშენდება და პროგრამის „აწარმოე საქართველოში“ ფარგლებში ფინანსური მხარდაჭერით სარგებლობს, რაც იმას ნიშნავს, რომ პირველი 2 წლის განმავლობაში პროცენტის თანადაფინანსებას სააგენტო „აწარმოე საქართველოში“ განახორციელებს. სააგენტოს დახმარებით განხორციელებული პროექტის ინვესტიციის ჯამური მოცულობა კი 1 200 000 ლარს შეადგენს.
2018 წლის თებერვლის თვის მონაცემებით, პროგრამის „აწარმოე საქართველოში“ პროექტის ფარგლებში სულ მხარდაჭერილია 335 პროექტი (მოიცავს ინდუსტრიულ, სოფლის, სასტუმროს და ქონების მიმართულებებს), რომელთა ჯამური ინვესტიციის მოცულობა 815 მლნ ლარზე მეტია. საიდანაც კომერციული ბანკების მიერ დამტკიცებული სესხების მოცულობა ჯამში 419 მლნ ლარზე მეტია. აღნიშნული პროექტებით სულ შეიქმნება 13,300-ზე მეტი ახალი სამუშაო ადგილი.
შეგახსენებთ, რომ „აწარმოე საქართველოში ‒ ბიზნესის“ მიმართულების მიზანია საქართველოში მეწარმეობის განვითარება, მეწარმის მხარდაჭერა, ახალი საწარმოების შექმნისა და არსებული საწარმოს გაფართოების ან გადაიარაღების ხელშეწყობა. სააგენტოს მთავარი მისია ქართული საწარმოების მხარდაჭერაში, მოგების გაზრდასა და გლობალური კონკურენტუნარიანობის განვითარებაში მდგომარეობს.