საქართველოს მთვრობას იმედი აქვს, რომ საჰაერო ხომალდების ტექნიკური მომსახურეობის გლობალურ ბაზარზე სამომავლოდ საქართველოს კონკურენტუნარიანობა გაიზრდება. აღნიშნულის მიღწევას კი ხელისუფლება „საგადასახადო კოდექსში“ შესატანი ცვლილებებით შეეცდება, რომლის მიხედვითაც დღგ-სგან განთავისუფლდება საქართველოს სახელმწიფო საზღვრის ფარგლებში საჰაერო ხომალდებისათვის ტექნიკური მომსახურების გაწევა.
საქართველოს ეკონომიკისა და მდგრადი განვითარების სამინისტროს, შპს აეროპორტების გაერთიანების დირექტორი ქეთი ალექსიძე განმარტავს, რომ ამ ეტაპზე ქვეყანას საჰაერო ხომალდების ტექნიკური მომსახურების სრული სპექტრის გაწევა არ შეუძლია, თუმცა შესაბამისი ინფრასტრუქტურის მშენებლობა უკვე დაწყებულია.
„როგორც თქვენთვის ცნობილია, საჰაერო ხომალდების ტექნიკური მომსახურების სრულ მაშტაბიანი ცენტრი საქართველოში არ არსებობს. ამ ეტაპზე თბილისის საერთაშორისო აეროპორტში შენდება დიდი საჰაერო ხომალდების ანგარი. აქედან გამომდინარე ვფიქრობთ, რომ აღნიშნული ინიციატივა ხელს შეუწყობს მათი ბიზნესის განვითარებას. როგორც იცით, საერთაშორისო მიმოსვლა განთავისუფლებულია დღგ-სგან. ბევრ ქვეყანაში ტექნიკური მომსახურებაც ასევე განთავისუფლებულია დღგ-სგან. აქედან გამომდინარე აღნიშნული ინიციატივა ხელს შეუწყობს საჰაერო ხომალდების ტექნიკური მომსახურეობის ცენტრის კონკურენტუნარიანობას საერთაშორისო ბაზარზე. იმიტომ, რომ ჩვენ გვყავს საკმაოდ კარგი სპეციალისტები და ასევე გრძელდება ახალი სპეციალისტების მომზადება. საქართველო ბევრად უფრო ახლოა ევროპის ქალაქებთან. ევროპაში ტექნიკური მომსახურება საკმაოდ მაღალ ხარჯიანია. აზიაში შედარებით დაბალია ხარჯი, თუმცა იქ ჩაფრენა ბევრად უფრო რთულია. ვფიქრობთ, რომ საქართველოში არსებული ბიზნესკლიმატი, ისევე როგორც ეს ახალი ინიციატივა, ხელს შეუწყობს ჩვენი ქვეყნის ამ მიმართულებით განვითარებას", განმარტავს ალექსიძე.