მსახიობ გიორგი გიორგანაშვილის (ბახალა) ადვოკატმა, გიორგი მახარაძემ სააპელაციო სასამართლოს მიმართა და გიორგანაშვილის მიმართ თბილისის საქალაქო სასამართლოს გამამტყუნებელი განაჩენი გასაჩივრა.
როგორც ადვოკატმა განაცხადა, არ არსებობს ბრალდების მხარის მიერ წარმოდგენილი მტკიცებულებათა ისეთი ერთობლიობა, რომელიც საკმარისი იქნებოდა გამამტყუნებელი განაჩენის გამოსატანად.
„ჩვენ სააპელაციო საჩივარში ყველაფერი აღვწერეთ და იმედი გვაქვს, სააპელაციო სასამართლო მიიღებს სამართლიან გადაწყვეტილებას და გიორგი გიორგანაშვილის გამამტყუნებელ განაჩენს გააუქმებს“, – აღნიშნა გიორგი მახარაძემ.
ცნობისთვის, გიორგი გიორგანაშვილს თბილისის საქალაქო სასამართლომ რვა წლით თავისუფლების აღკვეთა მიუსაჯა. გამოძიება მას განსაკუთრებით დიდი ოდენობით ნარკოტიკული საშუალების პირადი მოხმარების მიზნით შეძენა-შენახვას ედავებოდა.
