სებ-ი მალე საქართველოს დამფუძნებელი კრების (პარლამენტის) 100 წლის იუბილესადმი მიძღვნილი საკოლექციო დანიშნულების 5 ლარის ნომინალის მონეტას გამოუშვებს. პროექტზე მუშაობა უკვე დაწყებულია და შესაბამისად მონეტის დიზაინის ესკიზის შესაქმნელად კონკურსი გამოცხადებულია.
სებ-ში განმარტავენ, რომ 2019 წელს საქართველოს დამფუძნებელი კრების (პარლამენტი) 100 წლის იუბილეა. 1919 წლის მოწვევის დამფუძნებელი კრება იყო პირველი ქართული პარლამენტი, რომელიც შეიქმნა საქართველოს ისტორიაში პირველი მრავალპარტიული დემოკრატიული არჩევნების ჩატარების შედეგად.
აღნიშნულთან დაკავშირებით საქართველოს ეროვნულმა ბანკმა გადაწყვიტა, ამ თემაზე საკოლექციო დანიშნულების 5 ლარის ნომინალის მონეტა გამოუშვას.
საქართველოს დამფუძნებელი კრების (პარლამენტის) 100 წლის იუბილესადმი მიძღვნილი საკოლექციო დანიშნულების 5 ლარის ნომინალის მონეტის დიზაინის ესკიზი კონკურსის წესით შეირჩევა, რომელშიც მონაწილეობის მიღება შეუძლია ნებისმიერ მსურველს - როგორც ფიზიკურ (რეზიდენტი/არარეზიდენტი), ასევე იურიდიულ (რეზიდენტი/არარეზიდენტი) პირს, გარდა „საკოლექციო დანიშნულების ლარის ბანკნოტებისა და მონეტების თემატიკის (თემის) განსაზღვრისა და დიზაინის ესკიზის / ესკიზების შერჩევის“ დროებითი კომისიის წევრებისა და საქართველოს ეროვნული ბანკის თანამშრომლებისა.
საკონკურსო მასალების მიღება იწარმოებს ყოველ სამუშაო დღეს 2018 წლის 21 თებერვლიდან, 2018 წლის 23 მარტის ჩათვლით, დილის 10:00 საათიდან - 18:00 საათამდე, შემდეგ მისამართზე: ქ. თბილისი 0114, სანაპიროს ქ. #2 საქართველოს ეროვნული ბანკი.
კონკურსანტს მოეთხოვება მონეტის დიზაინის ესკიზ(ებ)ის მომზადება-წარმოდგენისას გაითვალისწინოს შემდეგი პირობები:
- მონეტის მახასიათებლები: ნომინალი - 5 ლარი; შემადგენლობა - ვერცხლი; დიამეტრი - 33 მმ; წიბო (გურტი) - გლუვი; ხარისხი - პრუფი;
- თემა: საქართველოს დამფუძნებელი კრების (პარლამენტი) 100 წლის იუბილე;
- დანიშნულება - საკოლექციო;
- მხატვრული შესრულების მოთხოვნები:
- დიზაინი უნდა შეიცავდეს შემდეგ სავალდებულო ელემენტებს:
- ვალუტის დასახელებას ქართულ ენაზე და ნომინალურ ღირებულებას ციფრებით - „5 ლარი“;
- ემიტენტი ქვეყნის დასახელებას ქართულ და ინგლისურ ენებზე - „საქართველო“, „Georgia”;
- გამოშვების წელს - „2019“;
- ლარის სიმბოლოს-„₾“;
- თემისა და მოვლენის აღმნიშვნელ დეტალ(ებ)ს/ წარწერებს.
- აღნიშნული სავალდებულო ელემენტების განთავსება შესაძლებელია მონეტის ავერსზე და/ან რევერსზე კონკურსანტის შეხედულებისამებრ.
- კონკურსანტს შეუძლია საკუთარი შეხედულებისამებრ შეარჩიოს და დიზაინში გამოიყენოს დამატებითი წარწერ(ებ)ი, რეკვიზიტ(ებ)ი, ან დეტალ(ებ)ი, გარდა კონკრეტული პიროვნების (მათ შორის კონკურსანტის) სახელის, გამოსახულების, ემბლემის, ლოგოს, საფირმო ნიშნის ან სხვა ინტელექტუალურ საკუთრებასთან დაკავშირებული კომერციული ორგანიზაციის დასახელების ან/და იდენტიფიკატორისა;
- სხვა მოთხოვნები დიზაინთან მიმართებაში:
- შეესაბამებოდეს საკონკურსო მონეტის თემას, დანიშნულებას და მახასიათებლებს (მნიშვნელოვანია);
- შეიცავდეს ფერად დეტალს (სასურველია);
- უნდა იყოს კონკურსანტის საკუთარი ნამუშევარი (ორიგინალი), ამასთან, დიზაინში სხვა რაიმე სიმბოლოს და/ან დეტალის გამოყენების შემთხვევაში, კონკურსანტის მიერ მითითებული უნდა იქნეს ასეთი სიმბოლოს და/ან დეტალის პირველწყარო (მნიშვნელოვანია);
- არ იყოს ასლი ან მსგავსი სხვა მონეტის დიზაინის (მნიშვნელოვანია).
- ტექნიკური შესრულების მოთხოვნები:
- საკონკურსო ესკიზ(ებ)ი უნდა შესრულდეს A4 ზომის ფორმატზე, როგორც საპრეზენტაციო, ისე მონეტის ორიგინალური ზომით, რომლის წარმოდგენა სავალდებულოა ნახატის/ესკიზის (ქაღალდზე), ფორმით.
- კონკურსანტის მიერ წარმოდგენილ უნდა იქნეს ფერადი ესკიზ(ებ)ი.
- ესკიზ(ებ)ს თან უნდა ერთვოდეს მონეტის აღწერილობის ტექსტი ამ მუხლის4.3 პუნქტის მოთხოვნის გათვალისწინებით და დიზაინის შინაარსის დეტალური, მკაფიო განმარტება.
- კონკურსანტს შეუძლია წარმოადგინოს მაქსიმუმ 2 განსხვავებული ესკიზი.
- კონკურსანტმა ეროვნულ ბანკში უნდა წარმოადგინოს ქონებრივად და უფლებრივად უნაკლო ესკიზი (ესკიზები). არცერთ მესამე პირს არ უნდა გააჩნდეს ქონებრივი, უფლებრივი ან ინტელექტუალური მოთხოვნები კონკურსანტის მიერ წარმოდგენილი ესკიზის მიმართ.
საკონკურსო მასალების მიღება იწარმოებს ყოველ სამუშაო დღეს 2018 წლის 21 თებერვლიდან, 2018 წლის 23 მარტის ჩათვლით, დილის 10:00 საათიდან - 18:00 საათამდე, შემდეგ მისამართზე: ქ. თბილისი 0114, სანაპიროს ქ. #2 საქართველოს ეროვნული ბანკი.
კონკურსში გამარჯვებული ესკიზისთვის განსაზღვრულია ფულადი ჯილდო 3000 ლარი (კანონმდებლობით გათვალისწინებული ყველა გადასახადის ჩათვლით).
კონკურსში გამარჯვებული ესკიზის ავტორისთვის (კონკურსანტისთვის) აღნიშნული ფულადი ჯილდოს ანაზღაურება მოხდება გადარიცხვით კონკურსანტის საბანკო ანგარიშზე საქართველოს ეროვნული ბანკის ვებ-გვერდზე (www.nbg.gov.ge) კონკურსის შედეგების შესახებ ინფორმაციის გამოქვეყნების შემდეგ გამარჯვებულ კონკურსანტთან ხელშეკრულების გაფორმებიდან 10 სამუშაო დღეში.
