„საპარლამენტო უმრავლესობა და ფრაქცია „ქართული ოცნება" ვგეგმავთ, რომ აუტისტური სპექტრის აშლილობების მქონე ბავშვებისთვის, ახალგაზრდებისთვის, ადამიანებისთვის გავაკეთოთ დღეს არსებული საჭიროებების სწრაფი ანალიზი", - ამის შესახებ საპარლამენტო უმრავლესობის ლიდერმა, არჩილ თალაკვაძემ აუტისტური სპექტრის დარღვევის მქონე ბავშვებისთვის საჭირო სერვისების გაფართოების საკითხებზე გამართულ შეხვედრაზე განაცხადა.
თალაკვაძემ აღნიშნა, რომ აუტისტური სპექტრის დარღვევის მქონე ბავშვებისთვის საჭირო სერვისების გაფართოება მოკლე ვადაში ვერ მოხდება, რადგან დაფინანსების საკითხთან ერთად არსებობს სხვადასხვა პრობლემები, მათ შორის: ადამიანური რესურსების, ცნობიერების ამაღლების, დიაგნოსტიკისა და გამოვლენის პრობლემები.
„ბუნებრივია, ზუსტად თქვენი მოსაზრებები, თქვენი ანალიზი და თქვენი რჩევები გვაინტერესებს იმისათვის, რომ გავაკეთოთ უფრო კონკრეტული მონახაზი, თუ რა მოლოდინები არსებობს საზოგადოების მხრიდან და იმ ადამიანების მხრიდან, ვისაც ეს სერვისები სჭირდება. თქვენ ყველაზე უკეთ იცით ეს, რადგან თავის დროზე იბრძოდით იმისთვის, რომ ეს სერვისები ყოფილიყო ჩვენს ქვეყანაში.
ჩვენი, ამ შემთხვევაში, საერთო ღირებულება არის ის, რომ ჩვენ მხარს ვუჭერთ ერთიან საზოგადოებას. საზოგადოების ყველა წევრს უნდა ჰქონდეს სოციალურ, პოლიტიკურ, კულტურულ, ეკონომიკურ პროცესებში თანაბარი მონაწილეობის შესაძლებლობა და ამ შემთხვევაში, აუტისტური სპექტრის აშლილობის მქონე ადამიანებს. ეს რომ მოხდეს, აუცილებელია მინიმალური სერვისების მიწოდება",-აღნიშნა საპარლამენტო უმრავლესობის ლიდერმა.
შეხვედრა ეროვნულ-დემოკრატიული ინსტიტუტის (NDI) და აშშ-ის საერთაშორისო განვითარების სააგენტოს (USAID) მხარდაჭერით გაიმართა.
შეხვედრაში მონაწილეობა მიიღეს ფრაქცია „ქართული ოცნების" წევრებმა: მამუკა მდინარაძემ, ნინო წილოსანმა და რატი იონათამიშვილმა, ასევე, თბილისის მერიის, საქართველოს შრომის, ჯანმრთელობის და სოციალური დაცვის სამინისტროს, საქართველოს განათლებისა და მეცნიერების სამინისტროს და საქართველოს სახალხო დამცველის აპარატის წარმომადგენლებმა.
როგორც მამუკამდინარაძემ დასძინა, ცნობიერების ამაღლებაში თუ წვლილის შეტანა იქნება ერთ-ერთი სერიოზულ შედეგი.