თუ შევხედავთ მთლიან სტატისტიკას, ვთქვათ საქართველოს რამდენი მოქალაქე ითხოვს თავშესაფარს და რამდენი სხვა – აღმოსავლეთის, აფრიკის, ყოფილი საბჭოთა ქვეყნების, ვნახავთ, რომ ეს ციფრი ძალიან მოკრძალებულია, – ამის შესახებ საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა სოზარ სუბარმა გერმანიაში საქართველოს მოქალაქეებთან დაკავშირებული საკითხის კომენტირებისას განაცხადა.
მისი თქმით, იმდენი მოქალაქე არც ცხოვრობს საქართველოში, რამდენი თავშესაფრის მაძიებელიც ყოველწლიურად მიმართავს ევროპას. მისივე თქმით, შესაბამისად, "ისე ვერ იქნება, რომ ამან პრობლემა შექმნას ევროპაში".
როგორც სუბარმა აღნიშნა, საქართველოს თითოეული მოქალაქე დიდი პასუხისმგებლობით უნდა მოეკიდოს თავის ქმედებას.
“პირველ რიგში, თითოეული მოქალაქე დიდი პასუხისმგებლობით უნდა მოეკიდოს თავის ქმედებას, რას აკეთებენ. ასევე, ჩვენ ვმუშაობთ პარტნიორებთან ერთად და მიღებული იქნება ყველა შესაბამისი ზომა. საუბარია ადმინისტრაციულ სამართალდარღვევათა კოდექსში ცვლილებებზე, საზღვრებზე კონტროლის გამკაცრებაზე. თუმცა მთავარი მაინც ისაა, მოქალაქეებმა შევიგნოთ, რომ ჩვენი ქმედებით ვავნებთ მთელ ქვეყანას და ასე წასული ვერც ერთი ადამიანი იქ ვერ დარჩება, ვერანაირ თავშესაფარს ვერ მოიპოვებს. საბოლოოდ, პრაქტიკულად სამუდამოდ აეკრძალებათ საზღვრებიდან გასვლა, იმ დღიდან, რაც მათი დეპორტაცია მოხდება და ავნებენ ქვეყანასაც და სხვა მოქალაქეებსაც. ვფიქრობ, ამის გააზრება ყველაზე საუკეთესო წამალია“, – განაცხადა სოზარ სუბარმა.