რამდენიმე ათეულმა მოსწავლემ ორშაბათს, ფლორიდის სკოლაში მომხდარი მასობრივი მკვლელობის ფაქტთან დაკავშირებით, პროტესტის ნიშნად, თეთრი სახლის კედელთან, მწოლიარე აქცია მოაწყო. ისინი ითხოვდნენ, რომ ამერიკის მთავრობამ გაამკაცროს იარაღის მიმოქცევის კონტროლი ქვეყანაში.
სროლა ფლორიდის შტატში მსხვერპლის რაოდენობით 2012 წლიდან დღემდე ყველაზე სისხლიანი აღმოჩნდა. ცნობისთვის, 2012 წელს სკოლაში „სენდი ჰოკ“ სროლის შედეგად 26 ადამიანი გარდაიცვალა.
მწოლიარე პროტესტის ჩატარების იდეა სკოლის მოსწავლეებს ელეანორ ნეხტერლაინს და უიტნი ბოუენს მოუვიდათ აზრად. წერს „სი-ენ-ენი“.
თავდაპირველად მათ მიერ ჩამოყალიბებულ ჯგუფს, სახელწოდებით „მოსწავლეები ქვეყანაში იარაღის ბრუნვის კონტროლის გამკაცრებაზე“ უნდოდა შეეკრიბა სიმბოლურად 17 ადამიანი და ეთხოვათ 3 წუთის განმავლობაში დაწოლილიყვნენ თეთრი სახლის წინ ტროტუარზე. რადგან, სწორედ 3 წუთი აღმოჩნდა საკმარისი 19 წლის სკოლის ყოფილი მოსწავლისთვის, ნიკოლას კრუზისთვის, რათა 17 ადამიანი ჩაეცხრილა. აღსანიშნავია, რომ მან იარაღი სრულიად კანონიერი გზით შეიძინა.
ორგანიზატორებს თავდაპირველად სურდათ ეთხოვათ ახლობლებისთვის და მეგობრებისთვის მონაწილეობა მიეღოთ ამ აქციაში, თუმცა თანდათან სოციალური ქსელის დახმარებით ჯგუფი გაიზარდა და აქციას ასზე მეტი ადამიანი შემოუერთდა, მათ შორის მშობლები და მასწავლებლები.
მონაწილეთა ერთი ნაწილი ტროტუარზე დაწვა, რათა სროლის შედეგად დაღუპული ადამიანების იმიტაცია მოეხდინათ. მეორე ნაწილი კი ტრანსპარანტებით აპტორესტებდ - „მე ვარ შემდეგი?“, „ გეყოთ ბავშვების ხოცვა“, „სკოლა არაა საშიში ადგილი“, „გიყვარდეთ ბავშვები და არა იარაღი“, „NRA (აშშ-ს იარაღის ეროვნული ასოციაცია) თქვენს ხელზეა სისხლი“ და სხვა.
აშშ-ს პრეზიდენტი დონალდ ტრამპი დაეთანხმა აზრს, რომ აუცილებელია ფედერალური ინსპექტირების სისტემის გასაუმჯობესება იარაღის გაყიდვისას. მან სენატორებთან ერთად განიხილა კანონპროექტი ამ საკითხთან მიმართებაში, თუმცა კანონპროექტში არ არის გათვალისწინებული არანაირი ახალი შეზღუდვები იარაღის შეძენასთან დაკავშირებით, მაგრამ აღნიშნულია უფრო დეტალური შემოწმების აუცილებლობის შესახებ.
აქციაზე ასევე მოვიდნენ იარაღის კონტროლის მოწინააღმდეგენიც. მოწოდებას - „შევაიარაღოთ მასწავლებლები“ - შეხვდნენ შეძახილებით „სირცხვილია“.
აშშ-ს იარაღის ეროვნული ასოციაცია აქტიურად უწყობს ხელს მასწავლებლებს იარაღის ტარებისთვის.
პირველი მცდელობა მასწავლებლების და სკოლის თანამშრომლების იარაღით აღჭურვის 2012 წელს მოხდა, „სენდი-ჰოკ“-ის სკოლის ინციდენტის შემდგომ. თუმცა ამ აზრს ყველა არ ემხრობოდა.
შეგახსენებთ, რომ ფლორიდის შტატში 15 იანვარს შეიარაღებული სტუდენტი შეიჭრა სასწავლო დაწესებულებაში, გახსნა ცეცხლი, შედეგად დაღუპულია 17 ადამიანი.
ამის შესახებ ინფორმაციას „ბი-ბი-სი“ ავრცელებს.
