თბილისი ევროპის საავიაციო ფორუმს CONNECT 2018-ს მასპინძლობს. ევროპული ავიაციის ცენტრად საქართველოს დედაქალაქი 20-22 თებერვლის განმავლობაში იქნება და საკმაოდ ბევრ შეხვედრებს უმასპინძლებს.
CONNECT 2018-ის საიუბილეო, რიგით მე-15 ღონისძიებაში მონაწილეობას 65 ავიაკომპანიისა და 250 აეროპორტის 500-ზე მეტი წარმომადგენელი იღებს.
შპს „საქართველოს აეროპორტების გაერთიანების“ დირექტორი ქეთევან ალექსიძე CONNECT 2018-ის ფარგლებში დაგეგმილ შეხვედრებს დიდ მნიშვნელობას ანიჭებს და მიაჩნია, რომ რიგი მოლაპარაკებები საკმაოდ წარმატებული აღმოჩნდება.
„ღონისძიებას აქვს რამდენიმე გრძელვადიანი და მოკლევადიანი პოზიტიური შედეგები. 6-7 თვის განმავლობაში საავიაციო სექტორში ტრიალებდა საქართველოს რეკლამა იმასთან დაკავშირებით, რომ აღნიშნული ღონისძიება ტარდება საქართველოში. ამ რეკლამაში საუბარი იყო ასევე იმაზეც თუ რატომ უნდა დავესწროთ ამ ღონისძიებას, რა შესაძლებლობები აქვს საქართველოს და რისი შეთავაზება შეგვიძლია.
ეს არის მყისიერი ცნობადობის ამაღლება საქართველოს შესახებ. უშუალოდ ღონისძიების ფარგლებში ჩამოდის 500-ზე მეტი დელეგატი. ეს არის ტურიზმში პირდაპირი კონტრიბუცია. ეს ადამიანები ნახულობენ საქართველოს, ბევრი მათგანი ადრე ჩამოვიდა, ზოგიერთიც კი რჩება და აგრძელებს საქართველოში მოგზაურობას. გუშინ ერთ-ერთი ქვეყნის წარმომადგენელი შემხვდა და მითხრა, რომ აღფრთოვანებულია საქართველოთი, მას შემდეგ რაც საპასპორტო კონტროლის დროს ღვინო მიიღო. მან თქვა, რომ არა ეს ღონისძიება ის ვერასოდეს შეძლებდა საქართველოში ჩამოსვლას და იმ შესაძლებლობების გაცნობას, რომელიც ჩვენ ქვეყანას აქვს. ასევე აქ არიან ადამიანები, რომლებიც უშუალოდ იღებენ გადაწყვეტილებას სად უნდა იფრინოს ამა თუ იმ ავიაკომპანიამ.
შემდგომ გრძელვადიან პერსპექტივაში ეს არის ახალი ავიაკომპანია, ახალი ავიაკომპანია არის ახალი მგზავრი. ახალი ავიაკომპანია არის პირდაპირი შემოსავალი აეროპორტისთვის და ასევე ყველა იმ სექტორისთვის, რომელსაც კავშირი აქვს მგზავრობასთან და ტურიზმთან“, აცხადებს „საქართველოს აეროპორტების გაერთიანების“ დირექტორი ქეთევან ალექსიძე.
ალექსიძის თქმით, ფორუმის მიზანია, რაც შეიძლება მეტი ავიაკომპანია დაინტერესდეს საქართველოს ბაზრით.
ქეთევან ალექსიძე განმარტავს, რომ საქართველოს ფრენების დაწყებასთან დაკავშირებით მოლაპარაკებები აქვს ძალიან ბევრ ავიაკომპანიასთან და ეს მოლაპარაკებები საკმაოდ გრძელვადიანია. მისივე განმარტებით, უწყება მჭიდრო კომუნიკაციაშია ასევე იმ კომპანიებთან, რომლებთაც საქართველოს ბაზრისადმი ინტერესი არ დააფიქსირეს, თუმცა სამომავლოდ შესაძლოა მათ გეგმებში უკვე საქართველოც ჩაჯდეს.
„იმ ავიაკომპანიებთანაც ინტენსიურად ვაგრძელებთ მოლაპარაკებებს ვინც ვთქვათ რაღაც პერიოდის წინ არ გამოხატეს დაინტერესება, თუმცა პერიოდულად მაინც ვეხმიანებით. ვსაუბრობთ იმ სიახლეებზე, რომელიც პერიოდულად საქართველოშია. ვიზალიბერალიზაციის შეთავაზება, რომელიც ჩვენ გვაქვს ძალიან მომხიბვლელია ავიაკომპანიებისათვის. ძალიან ბევრი შევბედრები გაქვს ჩანიშნული და ვფიქრობთ, რომ კარგი შედეგები გვექნება. შეიძლება ეს არ იყოს ხვალ, მაგრამ იყოს მომავალში.
ქეთი ალექსიძე განმარტავს, რომ ფორუმზე უკვე დარეგისტრირდნენ ისეთი წამყვანი ავიაკომპანიები, როგორიცაა: Royal Dutch Airlines, Gulf Air, Wizz Air, Ryanair, Ukraine International Airlines, Turkish Airlines, TUI France, Airzena, SAS Scandinavian Airlines, LOT Polish Airlines, British Airways, Ernest Airlines, Transavia, HOP, MIAT Mongolian Airlines, Tajik Air, PTL Airlines, Flybe, Blue Air, SWISS International Airlines, Iberia, Croatia Airlines, Eurowings, Nordica, Meridiana, Pegasus Airlines, Kuwait Airways, Flydubai, Ellinair, Lufthansa, Volotea, Atlas Global, Air France, air Baltic და სხვა.
CONNECT2018-ის ფარგლებში, დღეს 20 თებერვალს სასტუმრო „ბილტმორში“ ეკონომიკისა და მდგრადი განვითარების სამინისტროს შპს „საქართველოს აეროპორტების გაერთიანების“ დირექტორმა ქეთევან ალექსიძემ და საფრანგეთის აეროპორტის სააგენტოს აღმასრულებელმა დირექტორმა კარენ ბუტომ ერთობლივი პრესკონფერენცია გამართეს. როგორც მხარეებმა განაცხადეს, ფორუმზე დამსწრე დელეგატები განიხილავენ საჰაერო ტრანსპორტის სფეროში არსებულ და მოსალოდნელ გამოწვევებს, ასევე, საფუძველი ჩაეყრება ავიაკომპანიებსა და აეროპორტებს შორის ახალ ავიამიმართულებაზე თანამშრომლობას.