დეკანოზის ადვოკატები გაუთქმელობის შესახებ სისხლის სამართლის კოდექსის შესაბამისი ნორმის არაკონსტიტუციურად ცნობას ითხოვენ.
„საკონსტიტუციო სასამართლოში რამდენიმე ნორმა გავასაჩივრეთ. დღეს განიხილება რამდენიმე მუხლის წინასწარი შეჩერების საკითხი, მთავარი არსებითი სხდომები შემდეგ იქნება. ვასაჩივრებთ რამდენიმე მუხლს, რომელიც როგორც გაუთქმელობას, ასევე გამოძიების მონაცემების გახმაურებას ეხება“, - აცხადებს „ჯი-ეიჩ-ენთან“ ადვოკატი გიორგი ფანცულაია.
ის მიიჩნევს, რომ ვალდებულება რაც გაუთქმელობის შესახებ დოკუმენტზე ხელმოწერას ახლავს, ადვოკატებს ბრალდებულის სათანადო დაცვის უფლებას არ აძლევს.
„დაცვის უფლება არაერთი მიმართულებით შეგვეზღუდა. შესაბამისად, ეს ნორმები არაკონსტიტუციურია. ამის გამო, ე.წ. ციანიდის საქმეში გარკვეულ მოწმეთა გამოკითხვები, სხვადასხვა მიმართულებით მტკიცებულებები ვერ მოვიპოვეთ, ექსპერტიზები ვერ ჩავატარეთ. ჩვენ ე.წ. ციანიდის საქმის გამო აღმოვჩნდით ამ პრობლემის წინაშე და გავასაჩივრეთ, მაგრამ ამ ნორმების შეცვლა, შეჩერება, კორექტირება, ან გაუქმება, საყოველთაო ხასიათის იქნება და ყველა იმ საქმეს შეეხება, სადაც მსგავსი პრობლემა არის“, - აცხადებს ფანცულაია.