ბუტა რობაქიძის მკვლელობის საქმეზე სამსახურეობრივი უფლებამოსილების ბოროტად გამოყენებაში ბრალდებულ გურამ დონაძის განცხადებას, რომ პროკურატურასა და ძებნაში მყოფ ზაზა ბაქრაძეს შორის გარიგება მოხდა „ჯი-ეიჩ-ენთან“ პროკურორი დავით ნეფარიძე პასუხობს.
„ეს არის მხოლოდ ბრალდებულების განცხადება. ბრალდების მხარეს რაიმე სახის კომუნიკაცია ბაქრაძესთან არ ჰქონია და ვერც ექნებოდა იმ მარტივი მიზეზის გამო, რომ ეს პირი არის საერთაშორისო ძებნილი. მასთან არც რაიმე სახის საპროცესო შეთანხმებაზე საუბარი არ ყოფილა“ - განაცხადა „ჯი-ეიჩ-ენთან“ ბუტა რობაქიძის მკვლელობის საქმის პროკურორმა.
როგორც ცნობილა ბრალდების მხარე იმ ვიდეოჩანაწერების საქმეზე მტკიცებულებებად დართვას მოითხოვს, რომელშიც ზაზა ბაქრაძემ განაცხადა, რომ ბუტა რობაქიძის მკვლელობის ადგილი გაყალბებულია და რეალობის ამსახველი კადრები გურამ დონაძესთან ინახება.
