„დემოკრატიული მოძრაობის“ ერთ-ერთი ლიდერის, გიორგი ახვლედიანის განცხადებით, საპრეზიდენტო არჩევნებზე ხელისუფლების დამარცხებისთვის აუცილებელია, ოპოზიციურმა პარტიებმა საერთო კანდიდატი წარმოადგინონ.
როგორც მაინ „ჯი-ეიჩ-ენს“ განუცხადა, საერთო კანდიდატურის დასახელებაზე ლიდერთა საბჭო, რომელიც 15 ოპოზიციური პოლიტიკური პარტიისგან არის შემდგარი, დიდი ხანია ჩამოყალიბებულია, თუმცა მხოლოდ არასაპარლამენტო ოპოზიციის კონტექსტი საკმარისი არ არის და საჭიროა, პოლიტიკური ოპოზიციის უმრავლესობის გაერთიანება.
„აქ საუბარი არ არის ბლოკსა და კოალიციაზე, პოლიტიკურმა პარტიებმა მხოლოდ უნდა განაცხადონ, რომ არ აყენებენ თავიანთ კანდიდატს და მხარს უჭერენ პიროვნებას, რომელიც კონსულტაციების შედეგად შეირჩა. შემდეგ ყველა იმუშავებს თავის ამომრჩეველთან, რათა მხარი დაუჭირონ საერთო ოპოზიციურ კანდიდატს. თუ ოპოზიციური პარტიები არ შევთანხმდებით, ყველა ვარიანტში, ხელისუფლება მოიგებს. მართალია, ხელისუფლებას მძიმე ელექტორალური მდგომარეობა აქვს, ის ამომრჩევლის 50%-ზე მეტის მხარდაჭერას ვერ იმსახურებს, მაგრამ არჩევნებს იგებს ან მაჟორიტარების მეშვეობით, ან მხოლოდ იმიტომ, რომ ოპოზიცია ერთიან კანდიდატზე ვერ შეჯერდა, როგორც დედაქალაქის მერის ბოლო ორ არჩევნებზე მოხდა - ოპოზიციურმა პარტიებმა ერთმანეთს წაართვეს ხმები“, - განმარტავს გიორგი ახვლედიანი.
მისი თქმით, ჯერ კონკრეტულ პერსონაზე მსჯელობა არ დაწყებულა.
„პოლიტიკაში ახალი სახის პოზიციონირება რთულია, რადგან თუ საზოგადოება არ იცნობს კანდიდატს, მისდამი ნდობის გაღვივება, რამდენიმე თვეში, გაჭირდება.
„მიუხედავად ამისა, არ არის აუცილებელი, რომ ეს ადამიანი აქტიური პოლიტიკური ფიგურა იყოს. ის შეიძლება იყოს ან საზოგადო მოღვაწე, ან ბიზნესმენთა წრის წარმომადგენელი, მთავარია მას ჰქონდეს სათანადო ცოდნა და საზოგადოება იცნობდეს კარგ კონტექსტში. ამომრჩეველმა ხელისუფლების დამარცხების რეალური შესაძლებლობა დაინახა - თიანეთშიც და ოზურგეთშიც, როცა ერთი კონკრეტული კანდიდატი დაუპირისპირდა ხელისუფლებას, ამიტომაც,ორივე შემთხვევაში, ამ კანდიდატებმა გაიმარჯვეს“, - ამბობს ახვლედიანი და აღნიშნავს, რომ რადგან „ქართული ოცნება“ ყველაზე დიდ საშიშროებას ოპოზიციის მიერ საერთო კანდიდატის წარმოდგენაში ხედავს, „ევროპულ საქართველოს“ ამ პროცესებში მონაწილეობას უკრძალავს.
„“ევროპული საქართველო“ ცდილობს, როგორმე გამოძვრეს, არ სურს, შემოვიდეს მოლაპარაკებაში იმიტომ, რომ მათ ამის გაკეთებას კატეგორიულად უკრძალავს „ქართული ოცნება“. ჯერ სათანადო მიზეზი ვერ იპოვეს, ამბობენ, რომ არ სურთ იყვნენ იქ სადაც ნინო ბურჯანაძე იქნება. არადა, რა შუაშია ნინო ბურჯანაძე, როცა საერთო ოპოზიციურ კანდიდატზეა მსჯელობა. საკონსტიტუციო ცვლილებებზე საუბრისას "ევროპული საქართველოსთვის" პრობლემა არ ვყოფილვართ არც მე, არც დიმიტრი ლორთქიფანიძე და არც ქალბატონი ნინო ბურჯანაძე, იმიტომ, რომ მაშინ „ქართულ ოცნებას“ არ აუკრძალავს ამ საკითხზე მუშაობა, საპრეზიდენტო არჩევნები კი ივანიშვილისთვის ძალიან პრინციპული თემაა, შესაბამისად, მათ ოპოზიციასთან კონსოლიდაცია ეკრძალებათ. ასევე, სააკაშვილის გამოსვლა მოჰყავთ მიზეზად, მაგრამ ყველასთვის ცხადია სააკაშვილს არ მოხარშვია საერთო ოპოზიციური კანდიდატის დასახელება თავში, ამაზე ჩვენ სამი თვეა ვსაუბრობთ. ის საკმაო დროის განმავლობაში იყო შინაპატიმრობაში და ბევრი დრო ჰქონდა ამ დასკვნამდე მისასვლელად, თუმცა როცა გამოვიდა და დაიწყო ყოფილი თანაგუნდელების, ასევე, „პატრიოტთა ალიანსის" ლანძღვა დაუშვა ისეთივე შეცდომა, როგორიც აქამდეც ბევრჯერ მოსვლია“, - განაცხადა გიორგი ახვლედიანმა.
რაც შეეხება შეკითხვას, ხომ არ ფიქრობს „დემოკრატიული მოძრაობა“ ერთ რომელიმე კონკრეტულ პარტიასთან, მაგალითად, "პატრიოტთა ალიანსთან" გაერთიანებაზე, ის პასუხობს, რომ მსგავსი მსჯელობა არ ყოფილა.
„იმედი გვაქვს, „პატრიოტთა ალიანსი“ იქნება ამ პროცესების მონაწილე, ისევე, როგორც სხვა ოპოზიციური პარტიები, მაგრამ „ევროპული საქართველოს“ მონაწილეობის იმედი აღარ გვაქვს. მთავარია, საზოგადოებამ დაინახოს, ვის უკან ვინ დგას. ის ვინც მოლაპარაკებებიდან გამოძრომას შეეცდება, მოახდენს თვითლუსტრაციას, თვითლუსტრირებულ „ევროპულ საქართველოს“ კი არც შანსი რჩება და არც რეპუტაცია. თუ მაინც ვერ მოხდა ოპოზიციის გაერთიანება საერთო კანდიდატის ირგვლივ და „დემოკრატიულ მოძრაობას“ ჩვენი კანდიდატის დასახელება მოგვიწია, მაშინ ყველაზე წელში გამართულები ჩვენ ვიქნებით, რადგან დავასახელებთ ნინო ბურჯანაძეს, რომელსაც ვერც ოპოზიციის და ვერც ხელისუფლების წარმომადგენელი დაუდგება ახლოს“, - განაცხადა დემოკრატიული მოძრაობის“ წევრმა, გიორგი ახვლედიანმა.
