თეოლოგ ლადო ნარსიას თქმით, თუკი სტუდენტების მიერ ილია მეორესთვის გაგზავნილ ღია წერილს სინოდის მხრიდან რეაგირება არ მოჰყვება, ამ პრობლემების განხილვამ შესაძლოა, სასამართლოში გადაინაცვლოს.
ნარსია "რუსთავი 2"-ის გადაცემა "არჩევანში" აღნიშნავს რომ, ეს პრობლემა არაერთხელ დასვეს, თუმცა, რეაგირება ამ დრომდე არ ყოფილა.
„ამ წერილის მიზანი არის ის, რომ წმინდა სინოდს და ორგანოს, რომელსაც აქვს უფლება, ვალდებულებაც კი, იმოქმედოს ასეთი ტიპის პრობლემაზე, ჩვენ მივმართეთ და არ გვსურდა საჯაროდ დაგვესახელებინა კონკრეტული გვარები და სახელები, რომლებიც წარმოადგენენ მსხვერპლს ამგვარი ქმედების და ჩვენი მოწოდება გახლავთ ის, რომ წმინდა სინოდმა დაგვიბაროს, დაინტერესდეს ამ საკითხით და ჩვენ გვაქვს სამხილი იმისთვის, რომ წმინდა სინოდი დავარწმუნოთ ამგვარი ქმედების მართებულობაში“, - განაცხადა ლადო ნარსიამ.
მისი თქმით, საპატრიარქოში მიმდინარე მოვლენებთან დაკავშირებით მსჯელობა მიმდინარეობს არა ერთ კონკრეტულ ინსტიტუციაში არსებულ პრობლემაზე, არამედ ზოგადად საპატრიარქოში, ეკლესიაში არსებულ პრობლემაზე.
ცნობისთვის, სასულიერო სემინარიის ყოფილმა სტუდენტებმა საქართველოს მართლამადიდებელი ეკლესიის პატრიარქ ილია მეორეს ღია წერილით მიმართეს, სადაც წერენ, რომ სასულიერო სემინარიაში სტუდენტებს სცემენ, მონურ ფსიქიკას უვითარებენ და შეურაცხყოფას აყენებენ.