საქართველოს პროფკავშირების გაერთიანება, ხვალ 13 თებერვალს სააგიტაციო აქციას - "გახადე შრომა უსაფრთხო" გამართავს, პარალელურად ხელმოწერებს შეაგროვებს ხელისუფლებისთვის წარსადგენ პეტიციაზე შრომის უზრუნველყოფის მოთხოვნით.
როგორც პროფკავშირების მიერ გავრცელებულ განცხადებაშია ნათქვამი, კანონპროექტი რომლის განხილვასაც საპარლამენტო კომიტეტი უახლოეს დღეებში გეგმავს არ შეესაბამება ნაკისრ საერთაშორისო ვალდებულებებს და შსო-ს #81 ე კონვენციას.
"შრომის ინსპექციის გაუქმებიდან დღემდე, საქართველოს მასშტაბით საწარმოო უბედური შემთხვევის შედეგად გარდაცვლილია 450 მდე ადამიანი და დაშავებულია 800 ზე მეტი მუშა.
უკონტროლოდ მიტოვებული დასაქმების სფერო დასაქმებულთა სასაკლაოდაა ქცეული. კანონპროექტი კი რომლის განხილვასაც საპარლამენტო კომიტეტი უახლოეს დღეებში გეგმავს არ შეესაბამება ნაკისრ საერთაშორისო ვალდებულებებს და შსო-ს #81 ე კონვენციას. ის მთავარი პრინციპებისგან დაცლილია და არ არის აღჭურვილი კონკრეტული, მათ შორის სანქცირების მექანიზმებით.
ჩვენ ვითხოვთ უსაფრთხო შრომას - შემოგვიერთდით", - აცხადებენ პროფკავშირების გაერთიანებაში.
სააგიტაციო აქცია 13 თებერვალს, 12 საათზე თბილისში, მეტროსადგურ რუსთაველთან გაიმართება.
ამავე თემაზე: შრომის ინსპექციის დღეს არსებული ფორმატი არ შეესაბამება საერთაშორისო სტანდარტებსა და საუკეთესო პრაქტიკას - აუდიტის სამსახური