სამხრეთ კორეაში, ოლიმპიური თამაშების გახსნის ცერემონიაზე მყოფმა აშშ-ის ვიცე-პრეზიდენტმა მაიკლ პენსმა განაცხადა, რომ გაჩნდა ვაშინგტონსა და ფხენიანს შორის პირდაპირი მოლაპარაკებების შესაძლებლობა.
მისი თქმით, ახალი შესაძლებლობები გამოჩნდა იმ მოლაპარაკებების ფონზე, რომლებიც სამხრეთ კორეის პრეზიდენტთან მუნ ჩჟე ინთან გაიმართა.
,,სამხრეთი კორეა და ამერიკის შეერთებული შტატები შეთანხმდნენ ჩრდილოეთ კორეასთან ურთიერთობის ერთობლივ პირობებზე. თავიდან მოლაპარაკებებს სამხრეთ კორეა დაიწყებს, შემდეგ კი პროცესში პოტენციურად ამერიკის შეერთებული შტატებიც ჩაერთვება“,- აცხადებს პენსი.
მისი განმარტებით, დიპლომატიური ჩარჩოები ასეთია - ამერიკის შეერთებული შტატები და მისი მოკავშირეები გააგრძელებენ კიმ ჩენ ინის რეჟიმის წინააღმდეგ სანქციებს მანამ, სანამ ჩრდილოეთი კორეა არ გადადგამს სერიოზულ ნაბიჯებს დენუკლეარიზაციის მიმართულებით. თუმცა ტრამპის ადმინისტრაცია მზადაა ჩრდილოეთ კორეის წარმომადგენლებთან მოლაპარაკებების მაგიდას მიუჯდეს იქამდე, ვიდრე რეჟიმზე ზეწოლა გრძელდება.
