აშშ-ის ხელმძღვანელობით მოქმედმა საერთაშორისო კოალიციის ძალებმა სირიის სამთავრობო ძალებზე საჰაერო და საარტილერიო იერიში მიიტანა. ,,რადიო თავისუფლება“ აშშ-ის არმიის ცენტრალური სარდლობის მიერ 8 თებერვალს გავრცელებულ ინფორმაციაზე დაყრდნობით წერს, რომ იერიში მას შემდეგ განხორციელდა, რაც 7 თებერვალს, სირიის რეჟიმის მხარდამჭერი ძალები თავს დაესხნენ „სირიის დემოკრატიული ძალების“ შტაბ-ბინას.
ამერიკული სარდლობის ცნობით, მდინარე ევფრატის გასწვრივ არსებული დემილიტარიზებული ზონიდან 8 კილომეტრში განხორციელებული თავდასხმის დროს შტაბ-ბინაში იმყოფებოდნენ საერთაშორისო კოალიციის მრჩევლებიც. აშშ-ის არმიის ცენტრალური სარდლობის განცხადებით, საერთაშორისო კოალიცია განაგრძობს ევფრატის ხეობაში ექსტრემისტულ დაჯგუფებასთან, „ისლამურ სახელმწიფოსთან“ ბრძოლას და იტოვებს თავდაცვითი მოქმედებების უფლებას.
ამერიკული მედიასაშუალებები სამხედროებზე დაყრდნობით იუწყებიან, რომ იერიშის შედეგად ლიკვიდირებულია სირიის მთავრობის მხარდამჭერი დაჯგუფებების ასზე მეტი წევრი.