პროკურატურის მიერ გავრცელებულ ინფორმაციას, რომ რესტორანში 4 პირის დაჭრაში ბრალდებული მომღერალი, საბა სამუშია წარსულში ნარკოტიკული საშუალების უკანონო შეძენა-შენახვის ფაქტზე იყო გასამართლებული, მისი უფლებადამცველი არასწორს უწოდებს.
„ეს არასწორი ინფორმაციაა და ადამიანის უფლების დარღვევაა. სამუშია ნასამართლევი არ არის. მისი ნასამართლეობა გაქარწყლებულია, რაც იმას ნიშნავს, რომ ნასამართლევი არ არის. საუბარია არასრულწლოვან ასაკში ჩადენილ დანაშაულზეა საუბარი“, - განუცხადა „ჯი-ეიჩ-ენს“ საბა სამუშიას ადვოკატმა, ირმა შალამბერიძემ.
შეგახსენებთ, რომ საბა სამუშიას ბრალი სამი მუხლით - 117-ე მუხლის პირველი ნაწილით (ჯანმრთელობის განზრახ მძიმე დაზიანება), 118-ე მუხლის მესამე ნაწილით (ჯანმრთელობის განზრახ ნაკლებად მძიმე დაზიანება) და 239-ე მუხლის მესამე ნაწილით (ხულიგნობა, ჩადენილი ცეცხლსასროლი იარაღის ან იარაღად სხვა საგნის გამოყენებით) აქვს წარდგენილი.
ცნობისთვის,18 იანვარს თბილისში, გმირთა მოედანზე, რესტორან „აღაში“ ოთხი ადამიანი დაჭრეს. არსებული ინფორმაციით, დაჭრის ფაქტს წინ უძღოდა ურთიერთშელაპარაკება და ფიზიკური დაპირისპირება.
მომხდართან დაკავშირებით სამართალდამცავებმა 18 წლის მომღერალი, საბა სამუშია დააკავეს, რომელიც არსებული ინფორმაციით, დავით კენჭიაშვილის ჯგუფის მუსიკოსია.
რაც შეეხება დაჭრილი ახალგაზრდა მამაკაცს, ის ამ დრომდე რეანიმაციულ განყოფილებაში მართვით სუნთქვაზე რჩება.
