სამწუხაროა და გასაკვირი [რუსთავი 2-ის კრიტიკა], იმ პარტიის [ევროპული საქართველოს] მხრიდან, რომლის შემადგენლობაშიც არის ყველა ის მედიაზონდერი, რომელიც კი ჰყოლია ენმ-ს და ვისი სუსხიც, "რუსთავი 2"-ს საკუთარ თავზე უგრძვნია, - ასე გამოეხმაურა "ნაციონალური მოძრაობის" წევრი ზაალ უდუმაშვილი "რუსთავი 2"-თან დაკავშირებით "ევროპული საქართველოს" განცხადებას, რომელმაც ტელეკომპანია გააკრიტიკა.
როგორც უდუმაშვილმა აღნიშნა, სამწუხაროა, რომ დღეს "ევროპული საქართველო" ერთი-ერთში იმეორებს იმ ბრალდებებს, რაც ბიძინა ივანიშვილის მხრიდად, "რუსთავი 2"-ის მიმართ ისმოდა.
"სამწუხაროა, რომ დღეს ევროპული საქართველო ერთი-ერთში იმეორებს იმ ბრალდებებს, რაც ჩვენ ბიძინა ივანიშვილის მხრიდან გვესმის რუსთავი 2-ის მიმართ. სამწუხაროა და გასაკვირი, იმ პარტიის მხრიდან, რომლის შემადგენლობაშიც არის ყველა ის მედიაზონდერი, რომელიც კი ჰყოლია ენმ-ის და ვისი სუსხიც, რუსთავი 2-ს საკუთარ თავზე უგრძვნია. დამიჯერეთ, ვიცით, რაზეც ვსაუბრობთ. ამ პარტიას, მისი აწმყოსა და მისი ცალკეული წევრების გათვალისწინებით, არანაირი მორალური უფლება არ აქვთ, რუსთავი 2-ზე და მის გმირულ კოლექტივზე ასეთი სამარცხვინო განცხადებები ავრცელონ", - განაცხადა უდუმაშვილმა.
