„ჩემი დაცვის ქვეშ მყოფს ევსაუბრე, ის თავს დამანაშავედ არ ცნობს და დუმილის უფლებას იყენებს. ის ახლა სამხარაულის სამედიცინო ექსპერტიზის ბიუროში უნდა გადმოიყვანონ“, - განუცხადა „ჯი-ეიჩ-ენს“ დაკავებული მომღერალის, საბა სამუშიას ადვოკატმა, ირმა შალამბერიძემ.
რაც შეეხება სამუშიასთვის ბრალის დამძიმებას, როგორც ადვოკატი აცხადებს, ის ამასთან დაკავშირებით მოგვიანებით, მას შემდეგ გააკეთებს კომენტარს, რაც საქმის მასალებს გაეცნობა.
„ვერანაირ პოზიციას ვერ დავაფიქსირებ, რადგან საქმის მასალები 10 წუთის წინ გადმომეცა, გავეცნობი და შემდეგ გავაკეთებ კომენტარს“, - აცხადებს შალამბერიძე.
სამუშიას ბრალი რამდენიმე სათის წინ დაუმძიმდა. მას ბრალი სისხლის სამართლის კოდექსის სამი მუხლით - 117 მუხლის პირველი ნაწილით, 118 მუხლის მესამე ნაწილით და 239 მუხლის მესამე ნაწილით აქვს წარდგენილი.
117-ე მუხლის პირველი ნაწილი ჯანმრთელობის განზრახ მძიმე დაზიანებას ითვალისწინებს, რომელიც ისჯება თავისუფლების აღკვეთით ვადით სამიდან ექვს წლამდე. 118-ე მუხლის მესამე ნაწილი ჯანმრთელობის განზრახ ნაკლებად მძიმე დაზიანებას გულისხმობს, რაც ისჯება თავისუფლების აღკვეთით ვადით სამიდან ხუთ წლამდე, ხოლო 239-ე მუხლის მესამე ნაწილი ითვალისწინებს ხულიგნობას, ჩადენილს ცეცხლსასროლი იარაღის ან იარაღად სხვა საგნის გამოყენებით, რაც ისჯება თავისუფლების აღკვეთით ვადით ოთხიდან შვიდ წლამდე.
ცნობისთვის, რომ 18 იანვარს თბილისში, გმირთა მოედანზე, რესტორან „აღაში“ სამი ადამიანი დაჭრეს. არსებული ინფორმაციით, დაჭრის ფაქტს წინ უძღოდა ურთიერთშელაპარაკება და ფიზიკური დაპირისპირება.
მომხდართან დაკავშირებით სამართალდამცავებმა 18 წლის მომღერალი, საბა სამუშია დააკავეს, რომელიც არსებული ინფორმაციით, დავით კენჭიაშვილის ჯგუფის მუსიკოსია.
რაც შეეხება დაჭრილი ახალგაზრდა მამაკაცს, ის ამ დრომდე რეანიმაციულ განყოფილებაში მართვით სუნთქვაზე რჩება. მას ოპერაცია გამთენიისას ჩაუტარდა და დაზიანებები მარჯვენა ბარძაყზე და მარჯვენა წინამხარზე აღენიშნება.