„საქართველო შრომის უსაფრთხოების კუთხით სავალალო მდგომარეობაშია“, - ამის შესახებ საპარლამენტო უმრავლესობის წევრმა, ბექა ნაცვლიშვილმა „ჯი-ეიჩ-ენს“ Human Rights Watch-ის ანგარიშზე საუბრისას განუცხადა.
დეპუტატის განმარტებით, შრომის უსაფრთხოების კანონპროექტმა, რომელსაც პარლამენტი, სავარაუდოდ, უახლოეს სესიებზე მიიღებს, სამუშაო ადგილებზე უბედური შემთხვევების მაქსიმალური პრევენცია უნდა მოახდინოს.
„ვიმედოვნებ, ამ სესიების პერიოდში, აუცილებლად, მივიღებთ კანონს, რომელიც სრულფასოვნად დაარეგულირებს შრომის უსაფრთხოებისა და შრომითი უფლებების სფეროს. რაც შეეხება საწარმოო შემთხვევებზე ვინმეს პასუხისგების საკითხს, არ მაქვს ინფორმაცია გამოძიების მიმდინარეობაზე, მაგრამ როგორც ვიცი, სავალალო შემთხვევების შემდეგ, არავის პასუხისმგებლობის საკითხი არ დამდგარა ან თუ დადგა არა სათანადო ფორმით, თუმცა ჩემი ინტერესი არის არა პასუხისგებისა და დასჯის საკითხი, არამედ სამუშაო ადგილზე დაშავებისა და გარდაცვალების შემთხვევების მაქსიმალური პრევენცია. ზოგადად, დამსაქმებლის პასუხისგებით შეშინება არასწორი დამოკიდებულებაა, ეს ნიშანვს, რომ უარს ვიტყვით შრომის ინსპექციაზე, რადგან ადამიანის დაშინება - დაგიჭერენ თუ ვინმე შენს ობიექტზე გარდაიცვლება, არ არის პრევენციული მექანიზმი. აუცილებელია, დადგეს ყველას პასუხისმგებლობის საკითხი, ვისი ბრალეულობაც გამოიკვეთება, მაგრამ შრომის ინსპექცია სტანდარტებისა და რეგლამენტების დაცვისთვის იქმნება, რათა აღარ გვქონდეს ასეთი შემთხვევები“, - განაცხადა ბექა ნაცვლიშვილმა.
მისივე თქმით, საქართველოს ინერციით მოჰყვება უცხოური ინვესტიციებისა თუ ბიზნესინტერესების გაფეტიშება, თუმცა ამ მიდგომის მცდარობის გადააზრება მალე მოხდება.
„ეს არის ინერცია, რომელიც მოგვყვება მას შემდეგ, რაც დამოუკიდებლობა მოვიპოვეთ, და რაც საბაზრო ეკონომიკაა. ეს არ არის ის ევროპული საბაზრო ეკონომიკა, რისკენაც მივდიოდით, რადგან ევროპულ საბაზრო ურთიერთობებს აქვს ძალიან დიდი, სოციალური განზომილება, სადაც სახელმწიფო არის პასუხისმგებელი სწორედ იმ სტანდარტებზე, რასაც შრომის ინსპექცია თუ სურსათის უვნებლობა ჰქვია.ჩვენ კი მივიღეთ სრულიად დერეგულირებული საბაზრო ეკონომიკა, რომელიც ორიენტირებული იყო მხოლოდ უცხოურ ინვესტიციებზე და დაბალი ხარისხის კაპიტალის მოზიდვაზე, რამაც თუ გონიერი ადამიანები ვართ და გამოცდილებიდან შეგვიძლია დასკვნების გამოტანა, უნდა მიგვახვედროს, რომ უცხოურ ინვესტიციებზე დევნის გამო სტანდარტებზე უარის თქმამ, მათმა გაფეტიშებამ - თითქოს რომ არა ისინი, ვერ გადავრჩებოდით, კარგი არაფერი მოგვიტანა. მივხვდებით, რომ სხვანაირადაც შეიძლება ეკონომიკის მართვა, მაგალითად ახლანდელი ტენდენციების მსგავსად, როგორიცაა სოფლის მეურნეობის დახმარების პროგრამა და ა.შ. ინერცია იმდენად ძლიერია, მაინც არსებობს იმის განცდა, რომ ახლა ადრეა სტანდარტებზე ზრუნვა და აუცილებელია პირდაპირ ინვესტიციები მოვიძიოთ უცხოეთიდან, მაგრამ ვფიქრობ, ამის მცდარობის გადააზრება მოხდება ძალიან სწრაფად“, - განაცხადა ბექა ნაცვლიშვილმა.
Human Rights Watch-ის ანგარიშის მიხედვით, რომელშიც საქართველოში 2017 წელს განვითარებული მოვლენებია შეფასებული, ნათქვამია, რომ შრომის უსაფრთხოების ნორმების დაუცველობის გამო საქართველოში, ბოლო 5 წელიწადში 270 ადამიანი გარდაიცვალა, სამუშაოს შესრულების დროს მომხდარი ინციდენტების გამოძიება კი იშვიათად მთავრდება ვინმეს პასუხისმგებლობის დაყენებით.
ამავე თემაზე: მუშა, რომელიც თემქაზე მშენებარე ობიექტიდან გადავარდა, გარდაიცვალა