„ცოტა სხვა ბრძოლისთვის, სხვა მოვლენებისთვის ვემზადებოდით, თუმცა, ძალიან გვიხარია, რომ გამოძიება ობიექტურად და ისე ჩატარადა, როგორც უნდა ტარდებოდეს. მისასალმებელია, რომ ბრალდების მხარემ დაცვის მხარის პოზიცია გაიზიარა, იმასთან დაკავშირებით, რომ გიორგი ჭანტურია გარდაცვლილ ქუთათელაძის საქმესთან არაფერ შუაში იყო, ეს დადასტურდა კიდეც“, - განუცხადა „ჯი-ეიჩ-ენს“ გიორგი ჭანტურიას ადვოკატმა, ალექსანდრე კობაიძემ.
ადვოკატის განცხადებით, ყოფილი პროკურორი მზად არის საჭიროების შემთხვევაში გამოძიებასთან კვლავ ითანამშრომლოს.
„ჩვენ გამოძიებასთან ვითანამშრომლეთ და თუ კიდევ გაუჩნდებათ კითხვები, მზად ვართ კვლავ ვითანამშრომლოთ. ის ემოციურად დამუხტულია და კმაყოფილია, რომ უდანაშაულო ადამიანმა გამოძიების ეტაპზე დაამტკიცა თავისი უდანაშაულობა“, - აცხადებს კობაიძე.
ზეწოლის ფაქტზე მიმართავს თუ არა გათავისუფლებული ჭანტურია გენინსპექციას, ეს ადვოკატისთვის უცნობია.
„გიორგი თავისუფალია და თავად გადაყწვეტს როგორ მოიქცეს. ჩვენ კონსულტაციას გავუწევთ, მაგრამ გადაწყვეტილებას თვითონ მიიღებს....გამოძიება ინტენსიურად მიმდინარეობს, რომ ეს საქმე გახსნან, არის რაღაც დეტალები, სხვა პირები საუბრობენ მუქარებთან დაკავშირებით“, - დასძენს ადვოკატი.
შეგახსენებთ, რომ სამსონ ქუთათელაძე საკუთრ კაბინეტში მოკლული 15 იანვარს საღამოს იპოვეს. ის “სტამბოლის ბაზრის" ერთ-ერთი მფლობელი იყო.
მკვლელობის გამოძიების პროცესში ყოფილი პროკურორი, გიორგი ჭანტურია 17 იანვარს დააკავეს. საქმის ძიება სისხლის სამართლის 236-ე მუხლით დაიწყო, რაც საბრძოლო მასალის უკანონო შენახვას გულისხმობს.
გიორგი ჭანტურიამ ქვემო ქართლის პოლიციის დეპარტამენტის შენობა წუხელ დატოვა. მას მიმდინარე გამოძიებაზე ბრალი არ წარედგინა.
